Hankula Sun Tashi bayan Bam Ya Fashe Ana cikin Azumi a Yobe

• An shiga jimami a jihar Yobe bayan wani bam da aka binnne a cikin daji ya tashi, ya ritsa da wasu mutane da ke kusa da wajen
• Lamarin fashewar bam ɗin ya auku ne a wani ƙauyen Buni Yadi, hedkwatar ƙaramar hukumar Gujba ta jihar Yobe
• Bam ɗin ya fashe ne bayan da wani matashi ya yi kaciɓus da alburusai a cikin daji sannan sai ya yi ƙoƙarin buɗe su
• Fashewar bam ɗin ya yi sanadiyyar jikkata mutane uku yayin da aka garzaya da su zuwa asibiti domin ba su kulawar da ta dace

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

JIhar Yobe - Aƙalla mutane uku sun samu raunuka kuma an kai su asibiti bayan fashewar wani bam a jihar Yobe.

Lamarin fashewar bam ɗin wanda aka binne ya auku ne a ƙaramar hukumar Gujba ta jihar Yobe.

Kara karanta wannan

Tankar mai ta sake fashewa a Neja, hukumomi sun tashi tsaye

Jaridar Daily Trust ta rahoto cewa fashewar ta faru ne a ranar Asabar a ƙauyen Ngomari da ke garin Buni Yadi, hedkwatar ƙaramar hukumar Gujba.

Yadda bam ya fashe a Kauyen Yobe

Wata majiya mai tushe a yankin ta bayyana cewa lamarin ya faru ne lokacin da wani matashi mai shekaru 22 ya gano alburusai da kuma harsasai guda huɗu na bindigar AK47 yayin da yake nemo itacen girki a daji.

Matashin ya yi ƙoƙarin buɗe alburusan domin ganewa idonsa abubuwan da ke ciki.

"Ya ci gaba da dukan su da guduma, wanda hakan ya haddasa fashewar. Mutane uku, ciki har da matashin, sun samu raunuka daban-daban."

- Wata majiya

Da yake tabbatar da faruwar lamarin, sakataren ƙungiyar ƴan bola-bola ta ƙaramar hukumar Gujba, Malam Isyaku Dahiru, ya bayyana cewa an kai waɗanda suka jikkata zuwa asibitin ƙwararru na jihar Yobe da ke Buni Yadi domin samun kulawa cikin gaggawa.

Kara karanta wannan

Fubara: Gwamnonin PDP sun nufi kotun koli kan dokar ta baci a jihar Ribas

Ba a ji ta bakin ƴan sanda ba

Ƙoƙarin jin ta bakin jami’in hulɗa da jama’a na rundunar ƴan sandan jihar Yobe, SP Dungus Abdulkarim, ya ci tura.

Kakakin ƴan sandan bai ɗaga kiran da aka yi masa a waya ba har zuwa lokacin da ake kammala haɗa wannan rahoton, kuma bai biyo ba.

Ƴan ta’addan Boko Haram sun daɗe suna amfani da bama-bamai wajen kai hare-hare a yankin.

Ƴan ta'addan Boko Haram sun kai hari a Yobe

A baya rahoto ya zo cewa wasu ƴan ta'adda ɗauke da makamai da ake zargin na Boko Haram ne sun kai harin ta'addanci a jihar Yobe da ke Arewacin Najeriya.

Ƴan ta'addan sun kai harin ne a garin Gujba inda suka kashe wani jami'in ƴan sa-kai mai shekara 22 har lahira.

A yayin harin kuma, ƴan ta'addan sun ƙona shaguna takwas tare da lalata ɗakuna 12 bayan sun riƙa bi gida-gida suna farmakar jama'a.

Kara karanta wannan

Dokar ta baci: Ministan Tinubu ya caccaki Kwankwaso, ya fadi gazawarsa

Ƴan ta'addan sun kuma riƙa neman ƴan sa-kai domin su hallaka su a harin wanda suka kai a cikin tsakar dare.

Wanda ya tantance Muhammad Malumfashi, babban edita a Legit.ng.

Asali: Legit.ng