'Yan Bindiga Sun Kai wa Fulani Makiyaya Hari, An Sace Basarake da Wasu Mutane 38
- ‘Yan bindiga sun kai farmaki garin Janjala da ke Kagarko, jihar Kaduna, inda suka sace mutane 37, ciki har da Wakilin Fulani na yankin
- Maharan sun raba kansu gida uku, suna harbi ba kakkautawa, tare da kwashe shanu daga wuraren Fulani makiyaya da ke kusa da kauyen
- Rundunar ‘yan sanda ta tabbatar da harin amma ba ta bayar da karin bayani ba, yayin da ake ci gaba da neman agajin jami’an tsaro
CHECK OUT: Education is Your Right! Don’t Let Social Norms Hold You Back. Learn Online with LEGIT. Enroll Now!
Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida
Kaduna – ‘Yan bindiga dauke da mugayen makamai sun kai farmaki garin Janjala da ke karamar hukumar Kagarko a jihar Kaduna.
Rahoto ya nuna cewa 'yan ta'addar sun sace Wakilin Fulani na yankin, Alhaji Atah Adamu Wakili, wata mai shayarwa, da wasu mutane 37.
Asali: Getty Images
Maharan sun kuma kwashe shanu da dama daga garin yayin harin da suka kai da yamma, kamar yadda jaridar Daily Trust ta ruwaito.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Yadda 'yan bindigar suka kai farmakin
Wani jagoran al’umma a yankin, wanda ya tabbatar da lamarin ga wakilinmu ta wayar tarho a ranar Litinin, ya ce ‘yan bindigar sun mamaye kauyen da manyan makamai a hannunsu.
Jagoran al'ummar da ya nemi a sakaya sunansa ya ce wasu kuma suna sanye da kayan sojoji, inda suka raba kansu gida uku suka afka wa gidaje daban-daban.
Ya ce maharan sun rika harbi ba kakkautawa yayin da suka yi garkuwa da mutane da dama daga yankin da ma wasu Fulani makiyaya da ke kusa.
“Misalin karfe 10:00 na dare ne na samu kiran waya cewa an sace Wakilin Fulani na Janjala tare da matansa, babban dansa Abubakar, da wasu mutane 37,” inji jagoran.
Ya kara da cewa ‘yan bindigar sun yi ta cin karensu ba babbaka na tsawon kusan sa’o’i biyu ba tare da ko fargabar zuwan jami’an tsaro ba.
Majiyar ta shaida cewa:
“Har sai zuwa karfe 11:23 na dare ne wani daga cikin mazauna garin ya shaida mani cewa dakarun soji daga Kagarko sun shigo Janjala suna harbi sama.
"Amma kafin isowarsu, tuni ‘yan bindigar sun riga sun tsere da mutanen da suka sace da kuma shanun da suka kwashe."
'Yan bindiga na neman kudin fansa
Asali: Original
Wani dan uwan Wakilin Fulanin da aka sace, mai suna Ahmadu Atah, ya tabbatar da harin, yana mai cewa lamarin ya je fa su cikin fargaba.
“Wannan lamari yana damuna matuka, domin ‘yan bindigar sun shigo gidanmu suka sace mahaifinmu, Wakilin Fulani, tare da matansa da ‘ya’yansa da kuma wasu mazauna yankin.
"Yanzu haka ina Kaduna domin wani taro, amma ina rokon jami’an tsaro su hanzarta daukar mataki domin ceto su."
- Inji Ahmadu.
An rawaito cewa wannan harin na zuwa ne bayan wata guda da wani irin sa ya faru a ranar 11 ga Fabrairu, lokacin da ‘yan bindiga suka kai farmaki wasu kauyuka uku.
Kauyukan su ne: Mai-Iddo, Gidan Makeri, da Kuchimi, inda suka sace matar wani fasto da wasu mutum 15 tare da kona gidaje da amfanin gona.
A wannan lokacin, maharan sun bukaci a biya su Naira miliyan 50 tare da babura shida matsayin kudin fansa kafin su sako mutanen da suka sace.
Hukumar ‘yan sanda ya tabbatar da harin
Jami’an ‘yan sanda a yankin sun tabbatar da harin, amma ba su bayar da karin bayani ba.
Kakakin rundunar ‘yan sandan jihar Kaduna, ASP Hassan Mansur, bai daga kiran waya ba kuma bai amsa sakon tes da aka tura masa kan wannan harin ba har zuwa lokacin hada wannan rahoto.
Fulani sun yi arangama da 'yan banga
A wani labarin, mun ruwaito cewa, akalla mutane biyu suka mutu yayin da ƴan banga da Fulani makiyaya suka yi arangama a ƙaramar hukumar Bosso, jihar Neja.
Kara karanta wannan
'Yan sanda sun dakile shirin masu garkuwa da mutane, sun cafke miyagun masu laifi
Gwamnatin jihar Neja ta shaida cewa mutum bakwai na kwance a Asibitin Beji ana kula da lafiyarsu bayan samun rauni a faɗan da ya auku.
Muhammad Malumfashi, babban edita a sashen Hausa na Legit ya duba labarin.
Asali: Legit.ng
