NAFDAC Ta Garkame Wani Babban Kantin Sayar da Magunguna a Abuja, Ta Fadi Dalili

• NAFDAC ta rufe kantin magani a Abuja saboda sayar da magunguna da suka lalace, bayan rahoto daga wani mai kwarmato
• Tawagar binciken NAFDAC ta gano kayayyakin da suka lalace na sama da N7m, ciki har da kayan gwaji da ke barazana ga lafiya
• An cafke shugaba da magatakarda na kantin domin bincike, tare da tabbatar da hukunci mai tsauri don dakile irin wannan dabi’a
• Amfani da magungunan da suka lalace na haifar da illa ga lafiya da kuma nakasa tsarin garkuwar jiki, inji Dakta Shamsuddeen

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Abuja - Hukumar NAFDAC ta rufe wani kantin magani da ke Onitsha Crescent, Area 11 – Garki, Abuja, saboda sayar da magunguna da suka lalace kuma ba su da rijista.

Wannan mataki ya biyo bayan rahoto daga wani mai kishin kasa, wanda ya sa hukumar ta gudanar da bincike.

Kara karanta wannan

Sojoji su na ragargaza, an kai samamen dare a maboyar Boko haram

Abuja: NAFDAC ta rufe kantin magunguna

Hukumar NAFDAC ta bayyana haka a wata sanarwa da ta wallafa a shafinta na X (tsohuwar Twitter) a ranar Asabar.

A yayin binciken, NAFDAC ta gano magunguna da suka lalace wanda darajarsu ta kai sama da Naira miliyan bakwai, ciki har da "H-Pylori" na kayan gwaje gwaje.

Wannan kayan gwaji na da hadari sosai ga lafiyar jama’a, kamar yadda rahoton ya bayyana.

Abin da NAFDAC ta ce a Abuja

Hukumar ta cafke babban darakta da babban magatakarda na kantin don gudanar da karin bincike kan al’amarin.

Sanarwar ta ce:

"NAFDAC ta rufe kantin magani a Onitsha Crescent, Area 11 – Garki, Abuja, kan sayar da magunguna da suka lalace kuma ba su da rijista."

"Tawagar bincike ta gano kayayyaki da suka lalace, wadanda darajarsu ta kai sama da naira miliyan bakwai, ciki har da kayan gwaji masu hadari ga lafiyar jama’a."

Kara karanta wannan

An rusa gidan da masu garkuwa ke birne mutane, an gano kaburbura 30

NAFDAC ta nemi hadin kan jama'a

Duk da kokarin ma’aikatan kantin maganin na hana binciken, tawagar ta samu nasarar kwace kayan da suka lalace kuma ta kulle wurin.

An cafke shugaba da wani jami'in kantin domin amsa tambayoyi, tare da tabbatar da sanya tsauraran hukunci don kawo karshen irin wannan dabi’a.

NAFDAC ta yi kira ga jama’a da su kasance masu lura yayin sayen kayayyakin da ake sarrafawa tare da kai rahoton duk wani abu da ake zargi ofishin hukumar mafi kusa.

Illolin shan magungunan da suka lalace

Da muka tuntubi Dakta Shamsuddeen Abubakar, ya shaida mana cewa akwai hadari sosai a shan magungunan da suka lalace.

Dakta Shamsuddeen ya ce amfani da magungunan da suka lalace yana iya haifar da mummunar illa ga lafiyar dan Adam, yana mai cewa:

"Magungunan da wa'adin amfani da su ya kare sun da illa domin za su iya haifar da rashin lafiya mai tsanani ga mutum."

Kara karanta wannan

Gwamnan Bauchi ya yi wankin babban bargo ga Wike kan Tinubu

Magungunan da suka lalace suna dauke da sinadarai da za su iya zama masu cutarwa ga garkuwar jiki, a cewar likitan, inda ya kara da cewa:

"Magungunan da suka lalace na iya zama tushen yaduwar cututtuka, musamman ma ta hanyar nakasa tsarin garkuwar jiki."

NAFDAC ta rufe kamfanoni a Kano

A wani labarin, mun ruwaito cewa, jami'an NAFDAC a Kano sun kai sumame wasu kamfanonin yin magungunan dabobi a Bichi, jihar Kano.

NAFDAC ta kama masu kamfanonin magungunan kan zargin yin magunguna marasa inganci da sayar da su da lambar NAFDAC ta bogi.

Hukumar ta ce ta shafe watanni shida tana bincike kan magungunan kamfanonin, bayan lura da karuwar magungunan jabu a kasuwannin Kano.

Asali: Legit.ng