'Talaka Ya Samu Abinci': Sarakuna Sun Haskawa Tinubu Hanyar Gyara Tattalin Arziki

• Sarakunan gargajiya sun yi kira ga gwamnatin Bola Tinubu da ta magance matsalolin tattalin arziki da na karancin abinci
• Iyayen kasar sun nuna alhini kan rashin rayukan da aka yi a turereniyar karbar tallafin abinci da aka yi a Abuja, Anambra, da Oyo
• Sarakunan sun kuma yi hasashen kyakkyawar makoma ga Najeriya a shekarar 2025 tare da kira ga hadin kai da zaman lafiya

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Oyoyo - Sarakunan gargajiya sun bukaci gwamnatin tarayya ta gaggauta magance matsalar karancin abinci da wahalar tattalin arziki.

Sarakunan daga Kudancin Najeriya sun ce kasar nan za ta samu kyakkyawar makoma a shekarar 2025, duk da kalubalen da ake fuskanta.

Turereniya: Sarakuna sun yi wa jihohi ta'aziya

Jaridar Vanguard ta rahoto iyayen kasar sun yi magana kan turereniyar da ta faru yayin raba tallafin abinci a wasu jihohi, wanda ya jawo asarar rayuka.

Kara karanta wannan

Abin fashewa da ake zaton 'bom' ne ya tarwatse a makarantar islamiyya, ɗalibai sun mutu

A cikin wata sanarwa daga majalisar sarakunan gargajiya ta Kudancin Najeriya, sun bayyana alhini kan abubuwan da suka faru.

Sarakunan sun mika ta’aziyya ga iyalan wadanda suka rasa rayukansu a turmutsutsun karbar tallafi da ya faru a Abuja, Anambra, da Oyo.

Sarakuna sun ba da shawara kan tarukan jama'a

Sarakunan sun bukaci gwamnati ta ci gaba da yin aiki tukuru don inganta tattalin arziki da rage wahalar rayuwa a tsakanin al’umma.

Sun kuma shawarci masu shirya taruka da su yi amfani da jami’an tsaro wajen tsara shirye-shiryensu don kauce wa cunkoso, inji rahoton Daily Trust.

“Dole ne a tabbatar an dauki matakai na kare rayuka da lafiyar mahalarta taro wanda zai fara daga lokacin da ake shirin gudanar da irin wannan taron."

- A cewar sarakunan.

"A magance matsalar tattali" - Sarakuna

Sun kuma bukaci gwamnati, masu shirya taruka da hukumomin tsaro su dauki matakan kariya don kauce wa faruwa ire-iren wadannan abubuwan.

Kara karanta wannan

Rarara ya tara malamai 1,000 domin neman tsari daga sharrin bokayen Nijar, an yi addu'oi

“Abin bakin ciki ne. Muna mika ta’aziyyarmu ga iyalan wadanda suka rasa rayukansu a turereniyar da ta faru a jihohin kasar nan.”

“Wadannan abubuwan sun kara nuna muhimmancin bukar da ke da akwai ta magance matsalolin tattalin arziki da ke addabar kasar.”

- A cewar sanarwar.

Hasashen sarakuna kan shekarar 2025

Sarakunan sun yi hasashen cewa Najeriya za ta samu ci gaba a shekarar 2025 ta hanyar koyon darasi daga kalubalen da ta fuskanta a 2024.

Sun yi imanin cewa kalubalen da kasar ta fuskanta kuma ta fita daga cikinsu a 2024 za su taimaka wajen magance matsalolin 2025.

Sun jaddada bukatar hadin kai tsakanin ‘yan Najeriya, ba tare da la’akari da bambance-bambancen addini ko kabilanci ba.

"Za a samu sauki a 2025" - Hasashen Fasto

A wani labarin, mun ruwaito cewa shugaban Cocin Freedom Apostolic Revival Fasto Samuel Adebayo Ojo, ya ce wahalhalun Najeriya za su kare nan gaba kadan.

Kara karanta wannan

Farfesoshin Jami’ar ABU Zaria sun fito da illolin da ke cikin kudirin gyaran haraji

Yayin taron shekara-shekara a Ori Oke Ogo kusa da Ibadan, malamin ya hango cewa 2025 za ta samu karuwar alheri da kwanciyar hankali a wannan shekarar.

Malamin ya bayyana wa dubunnan masu ibada cewa Ubangiji ya nuna masa cewa wahalhalun Najeriya za su ragu a shekarar 2025.

Muhammad Malumfashi, babban edita a sashen Hausa na Legit ya duba labarin.

Asali: Legit.ng