Yadda Aminin Turji Ke Tsula Tsiyarsa, Wasu a Yankin Sokoto Sun Roki Gwamnati Alfarma

• Mazauna yankunan Idi da Ranbadawa a jihar Sokoto sun nemi gwamnati ta tsare su daga zaluncin Kallamu, wani aminin Bello Turji
• Kallamu ya mamaye yankin, yana mulkin kama-karya ba tare da tsoro ba, wanda ya jefa al’ummomin cikin firgici da rashin tsaro
• Mutanen gari na roƙon gwamnati ta gaggauta daukar matakin dawo da doka da oda don kare rayuka da dukiyoyinsu

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Sokoto - Mazauna garuruwan Idi da Ranbadawa a yankin Gobir a jihar Sokoto sun roƙi hukumomi su tsoma baki don kubutar da su daga zalincin yan bindiga.

Mazauna garuruwan sun nuna damuwa kan halin da suke ciki kan zaluncin Kallamu, wani sanannen shugaban ‘yan fashi kuma aminin Bello Turji.

Yadda aminin Bello Turji ya addabi al'ummar Sokoto

Kara karanta wannan

Gwamna ya ziyarci kauyuka 2 da jirgin sojoji ya jefa bama bamai kan bayin Allah

Rahoton Zagazola Makama ya ce Kallamu ya zama kamar wani mai mulki a yankin, inda yake tafiyar da harkokinsa ba tare da tsoro ba, kuma ya mayar da hukumomin yankin ba komai ba.

Wasu mazauna yankin sun bayyana yadda Kallamu ke cin karensa babu babbaka tare da jagorantar ayyukan ta'addanci.

“Duk wanda ya gan shi yana yawo a Idi yana kama da wanda ya mallaki garin, ba wanda ya isa ya kalubalance shi."

- Cewar wani mazaunin yankin

Wasu majiyoyi sun nuna cewa Kallamu yana amfani da ikonsa wajen gudanar da aikace-aikacen laifuka a yankin.

An tabbatar da cewa ikonsa a yankin yana neman fin na gwamnati inda ya bar jama’a babu kariya ko damar neman adalci daga hukuma.

Ta'addanci: Mazauna Sokoto sun roki gwamnati alfarma

“Duk lokacin da ya zo gari, mutane ko dai su durƙusa masa saboda tsoro ko kuma su gudu don tsira da rayukansu, ya mamaye garinmu, kuma muna rayuwa a hannunsa."

Kara karanta wannan

Babban malami a Arewa ya dura kan gwamnati, ya ce ita ta jawo rasa rayuka a jihohi 3

- Cewar wata majiya

Al’ummomin Idi da Ranbadawa sun yi kira ga gwamnati da hukumomin tsaro su dauki matakin gaggawa don dawo da tsaro da kuma kare rayuka.

“Mun roƙi gwamnati ta ceto mu daga wannan masifa, babu inda muka samu mafaka, kuma rayuwarmu tana cikin hatsari kullum."

- Cewar wani dattijo a yankin

Yaran Bello Turji sun yi ta'asa a Sokoto

Mun ba ku labarin cewa wasu ƴan bindiga da ake zargin suna da alaƙa da Bello Turji sun yi garkuwa da matafiya a jihar Sokoto da ke yankin Arewa.

Ƴan bindigan waɗanda ke ta'addancinsu a gabashin Sabon Birni sun yi garkuwa da matafiyan a ranar Talata, 24 ga watan Disambar 2024.

Asali: Legit.ng