IPMAN Ta Fadi Dalilin Kin Cika Alkawarin Fara Sayar da Litar Fetur a kan N935

• Kungiyar dillalan man fetur ta kasa (IPMAN) ta tabbatar da cewa har yanzu ba ta fara sayar da fetur mai rahusa ba
• Shugaban kungiyar, shiyyar Arewa maso Yamma, Salisu Ten-Ten ya ce akwai abin da ya hana su fara aiwatar da haka
• Jinkirin na zuwa bayan masu ruwa da tsaki a bangaren fetur sun sa wa jama'a rai da samun saukin tsadar mai

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

Jihar Kano - Kungiyar dilalan man fetur ta kasa (IPMAN) ta gaza cika alkawarin da ta yi na fara sayar da kowace litar fetur a kan farashi mai rangwame.

Kamfanin mai na kasa (NNPCL) da Matatar Dangote sun rage farashin mai da su ke sayar wa 'yan kasuwa domin a sayar wa talaka da sauki.

Kara karanta wannan

'Yan bindiga sun harbe jariri dan shekara 1 da mutane da dama

BBC Hausa ta ruwaito cewa amma an samu tsaiko a wajen fara cika alkawarin da 'yan kungiyar IPMAN su ka dauka tun tuni.

Dalilin IPMAN na jinkirta saukaka farashin fetur

Shugaban dillalan na shiyyar Arewa maso Yamma, Salisu Ten-Ten ya bayyana cewa ba yanzu za su fara sayar da man fetur a kan sabon farashin N935 ba.

Salisu Ten-Ten ya ce 'yan kasa za su fara sayen fetur a farashin N935 ne idan tsofaffin kaya da su ka sayo sun kare tas, amma bai fadi yaushe ne ba.

IPMAN ta amince da rage farashin fetur

A karin bayani da ya yi wa majiyar Legit a Kano, Sakataren kudi na IPMAN , Musa Yahaya Mai Kifi ya ce batun fara sayar da man Dangote a kan N935 na nan. Ya ce:

"Akwai tattaunawa da ake yi tsakanin MRS, ma'ana Dangote din ke nan da kungiyar dillalan man fetur cewa ana son su rika dauko man a kan N935, a zo kuma a sayar da shi a kan N930."

Kara karanta wannan

Zanga zanga: Amnesty ta yi zargin ana son 'karasa' matashin da 'yan sanda suka jefawa gurneti

"Amma za a biya kudin dako, sannan za a biya wanda ya saida a gidan mansa kudin ribarsa da kuma wahalhalun gidan mansa. To amma gaskiya har yanzu ba a gama tattaunawa ba.

"Domin maganar da ake yi, harkar biyan kudin dako din, har yanzu ba a samu matsaya a kanta ba, saboda a halin da ma mu ke ciki har yanzu, akwai kudadenmu a hannun gwamnatin tarayya ko kuma a hannun NMDPRA."

IPMAN ta shiga yarjejeniya da Dangote

A baya, kun ji cewa kungiyar dillalan man fetur ta kasa (IPMAN) ta tabbatar da cewa ta shiga yarjejeniya da matatar Ɗangote domin a fara sayar da litar fetur da sauki.

Shugaban kungiyar na kasa, Alhaji Maigandi Haruna ne ya tabbatar da haka, inda ya kara da cewa za a fara sayar da fetur a kan N935 kowace lita, sai dai hakan ba ta tabbata ba.

Muhammad Malumfashi, babban edita a sashen Hausa na Legit ya duba labarin.

Asali: Legit.ng