Rai Baƙon Duniya: Tsohon Gwamna a Najeriya Ya Riga Mu Gidan Gaskiya

• An tafka babban rashi bayan mutuwar tsohon gwamnan jihar Akwa Ibom, Manjo-janar Godwin Osagie Abbe
• Marigayin ya rasu ne a ranar Asabar 21 ga watan Disambar 2024 a Abuja bayan fama da doguwar jinya
• Kafin rasuwarsa, matsayin ya mulki jihohin Akwa Ibom da Rivers a matsayin soja kafin rike muƙamin Minista

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Akwa Ibom - Tsohon gwamnan jihar Akwa Ibom a mulkin soja, Godwin Osagie Abbe ya riga mu gidan gaskiya.

Marigayin ya rike muƙamin Ministan Tsaro a zamanin marigayi Shugaban Ƙasa, Umaru Musa Yar'Adua.

Yaushe marigayi tsohon gwamnan ya rasu?

Vanguard ta ruwaito cewa Janar Abbe ya mulki jihar Akwa Ibom daga 31 ga Yulin 1988 zuwa 5 ga Satumbar 1990.

Sannan marigayin ya kuma mulki jihar Rivers daga Agustan 1990 zuwa Janairun shekarar 1992.

Kara karanta wannan

'Abu ya zo da ƙarar kwana': Wani jami'an tsaro ya riga mu gidan gaskiya a bakin aiki

Marigayin ya rasu ne a Abuja a ranar Asabar 21 ga watan Disambar 2024 bayan fama da doguwar rashin lafiya.

Tsohon Manjo-janar ɗin, wanda ɗan jam’iyyar PDP ne, ya kuma rike mukamin Ministan Harkokin cikin gida a zamanin marigayi Shugaba Umaru Yar'Adua.

An haife shi a ranar 10 ga Janairum 1949, kuma zai cika shekaru 75 a duniya a ranar 10 ga Janairun 2025, cewar Daily Post.

Karatu da rayuwar marigayin a gidan soja

Marigayin ya kammala karatun digirin shi na biyu a Harkokin Duniya daga Jami’ar Obafemi Awolowo (OAU), Ile-Ife.

Ya kuma samu horo daga Makarantar Sojin Amurka ta Infantry, Fort Benning da Georgia da Kwalejin Sojin Ghana; da Cibiyar Kasa ta Tsare-Tsare da Dabarun Siyasa a Kuru.

A lokacin aikinsa, ya rike mukamin Babban Kwamandan Runduna ta 2 ta Sojojin Najeriya (GOC) da Kwamandan Rundunar Horarwa da Tsare-Tsare (TRADOC) da da Kwamandan Kwalejin Yaki ta Kasa.

Kara karanta wannan

Hadimin Tinubu ya roƙi tsohon ɗan takarar gwamna ya koma jam'iyyar APC

Marigayi Janar Abbe ya yi ritaya daga aikin soja a shekarar 1999 da mukamin Manjo Janar.

Jarumin masana'antar Kannywood ya rasu

Kun ji cewa Masana'antar Kannywood ta rasa jarumi Baba Ahmadu, wanda aka fi sani da Hedimasta a shirin Dadin Kowa mai dogon zango.

Shugaban hukumar tace fina-finai, Abba El-Mustapha, ya sanar da rasuwar Baba Ahmadu tare da mika sakon ta'aziyyarsa.

Asali: Legit.ng