Kasafin Kudi: Yadda Gyara Gidajen Tinubu, Shettima Za Su Lakume N6.36bn
- Gwamnatin tarayya ta shirya yin gyara a gidajen shugaban ƙasa Bola Ahmed Tinubu da mataimakinsa Kashim Shettima
- An ware N6.36bn a cikin kasafin kuɗin shekarar 2025 da aka gabatarwa majalisar tarayya domin gudanar da ayyukan
- Daga cikin waɗanda za su amfana da gyaran da za a yi har da masu taimakawa shugaban ƙasan da mataimakinsa
Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi
FCT, Abuja - Gwamnatin tarayya ta ware maƙudan kuɗaɗe domin gyara gidajen shugaban ƙasa Bola Tinubu, Kashim Shettima, da wasu mataimakansu a cikin ƙudirin kasafin kuɗin 2025.
Gwamnatin tarayyar dai ta ware Naira biliyan 6,364,181,224 domin gudanar da ayyukan.
Source: Facebook
Binciken da jaridar The Punch ta yi a kan shirin kashe kuɗaɗen da ke ƙunshe a cikin ƙudirin kasafin kuɗi na shekarar 2025 da aka gabatarwa majalisar tarayya ya nuna hakan.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Gyara gidajen Tinubu, Shettima zai ci N6.36bn
Binciken ya nuna cewa gyaran da ake yi a fadar shugaban ƙasa a duk shekara zai ci N5.49bn.
A cewar kasafin kuɗin, N765m za a yi amfani da ita wajen gyara kwatas na mataimakin shugaban ƙasa da kuma masaukin baƙi.
Gyaran kwatas ɗin shugaban ƙasa a fadar shugaban ƙasa zai ci N6.39m, yayin da gyaran wuraren tsaro, ɗakunan taro, ɗakin motsa jiki da kwatas na hadiman shugaban ƙasa zai ci N49m.
Wani bincike da aka yi a kan kasafin ya nuna cewa ana sa ran Tinubu da mataimakinsa za su samu N87m a matsayin alawus-alawus na zama, yayin da aka ware N127m domin siyan motocin SUV.
Har ila yau, an ware Naira biliyan 3.66 domin siyan motoci a fadar shugaban ƙasa, sannan kuma za a kashe N1,09bn wajen sauya motocin SUV a fadar gwamnati.
An raina talaka
Salisu Mika ya shaidawa Legit Hausa cewa ko kaɗan abin da shugabanni ke yi a Najeriya ba su kyautawa. Ya caccaki kuɗaɗen da aka ware domin yin gyare-gyaren.
"In ban da rashin tausayi ta ya ya za a ce a ware waɗannan kuɗaɗen domin yin wani gyara kawai. Mutanen nan na ganin yadda akw shan wahala a ƙasar nan, amma ba talaka ba ne a gabansu."
"Ko a kasafin kuɗin shekarar 2024 an ware kudaɗe domin irin makamancin wannan gyaran amma sai ga shi a 2025 ma an ƙara."
-.Salisu Mika
Tinubu, Shettima za su ci N9bn a tafiye-tafiye
A wani labarin kuma, kun ji cewa an bayyana kuɗaɗen da shugaban ƙasa Bola Ahmed Tinubu da Kashim Shettima za su ci domin tafiye-tafiye a 2025.
A cikin kasafin kuɗin shekarar 2025, alƙaluma sun bayyana cewa shugaban ƙasan da mataimakinsa za su laƙume N9bn a tafiye-tafiye da cin abinci.
Asali: Legit.ng
