Sheikh Gumi Ya Nemo Hanyar Yakar Lakurawa, Ya Fadi Masu Daukar Nauyinsu

• Fitaccen malamin Musulunci a jihar Kaduna, Sheikh Ahmed Abubakar Gumi ya ba gwamnatin Najeriya shawara kan Lakurawa
• Sheikh Ahmad Gumi ya ce har yanzu ba a gama tantance ainihin akidar yan kungiyar Lakurawa ba a Najeriya
• Malamin ya bukaci samar da wasu dakaru da ba na hukuma ba domin yakarsu ba kawai sojoji da aka kirkira domin yaki ba

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Kaduna - Sheikh Ahmed Mahmud Gumi ya yi magana kan yan kungiyar ta'addanci ta Lakurawa a Najeriya.

Sheikh Gumi ya shawarci Gwamnatin Tarayya ta samar da jami'an tsaro na musamman domin yakar yan ta'addan Lakurawa.

Sheikh Gumi ya magantu kan 'yan Lakurawa

Shehin malamin ya bayyana haka ne yayin hira da gidan rediyon Eagle 102.5 FM wanda jaridar Legit ta bibiya.

Kara karanta wannan

Ana zargin Lakurawa sun yadu zuwa Kaduna, Tinubu ya nemo hanyar dakile matsalar

Sheikh Gumi ya ce har zuwa yanzu ba a iya tantance ainihin akidar Lakurawa ba duba da harin da suka kai a Mera da ke jihar Kebbi.

Bayan kisan mutane 17 a Mera, malamin ya ce za a iya cewa ba su da bambanci da sauran yan ta'adda da ke yankin Sahel, New Telegraph ta ruwaito.

Lakurawa na samun taimakon kasashen waje?

"Akwai wadanda ke daukar nauyinsu daga ƙasashen ketare saboda akwai albarkatun kasa da yawa a Najeriya."

"Suna zuwa domin albarkatun kasa inda suke kawo rudani saboda mu nemi kariyarsu daga baya."

- Sheikh Ahmed Mahmud Gumi

Sheikh Gumi ya kawo hanyar gamawa da Lakurawa

Sheikh Gumi ya koka kan kwarewar sojoji, ya ce ba su da cigaban da za su yaki yan ta'adda a halin da ake ciki, cewar rahoton Daily Post.

Ya ce ya kamata a sani jami'an tsaro na wadanda ba na hukuma ba da suke da masaniya kan yankunan ba sojoji da kawai yaki da yan uwansu sojoji suka sani ba.

Kara karanta wannan

'Karshen Turji da yan bindiga ya kusa': Ministan tsaro bayan karbar jirage daga Turkiyya

"An tsara sojojin Najeriya kamar irin na Birtaniya ba wai domin su yaki yan bindiga ba sai dai sojoji yan uwansu."

- Sheikh Ahmed Gumi

Lakurawa sun fantsama wasu jihohin Arewa

Kun ji cewa Gwamnatin Tarayya ta dauki matakin kara tura jami'an tsaro yankunan da yan kungiyar Lakurawa suka addaba.

Ministan tsaro, Muhammad Badaru Abubakar ya tabbatar da haka, ya ce sojojin sama sun yi ruwan wuta kan yan ta'addan.

Muhammad Malumfashi, babban edita a sashen Hausa na Legit ya duba labarin.

Asali: Legit.ng