Gwamna Zulum Ya Kara Yi Wa Ma'aikata Karin Albashi bayan Amincewa da N70,000

• Likitocin da ke aiki a ƙarƙashin gwamnatin jihar Borno za su samu ƙarin albashi daga ranar, 1 ga watan Disamban 2024
• Gwamna Babagana Umar Zulum ya amince a yi musu ƙari su riƙa karɓar albashi daidai da wanda ke aiki da gwamnatin tarayya ke samu
• Zulum ya umarci shugaban ma'aikatan jihar da kwamishinan lafiya su tabbatar an aiwatar da hakan ga likitocin

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Borno - Gwamnan Borno, Babagana Umara Zulum ya amince da ƙarin albashi ga likitocin da ke aiki a ƙarƙashin gwamnatin jihar.

Gwamna Zulum ya amince a yi wa likitocin ƙari su koma suna karɓar albashi iri ɗaya da abinda ake biyan takwarorinsu a matakin tarayya.

Zulum ya yi wa likitoci karin albashi

Jaridar Daily Trust ta rahoto cewa Zulum ya sanar da amincewar ne a jiya yayin da yake gabatar da jawabinsa a wani taro na majalisar harkokin lafiya ta ƙasa karo na 65.

Kara karanta wannan

NLC ta ba Gwamna Radda wa'adi kan shiga yajin aiki a Katsina

Zulum ya umarci shugaban ma’aikata da kwamishinan lafiya su haɗa kai da hukumomin gwamnatin tarayya da abin ya shafa, domin cike giɓin da ke tsakanin abin da ake biyan likitocin da ke aiki a jihar da na gwamnatin tarayya.

Yaushe za a fara biya?

Gwamna Zulum ya ba da umarnin fara biyan ƙarin albashin daga ranar, 1 ga watan Disamba 2024, rahoton jaridar Businessday ya tabbatar.

"Ku yi aiki da hukumomin gwamnatin tarayya da abin ya shafa domin tabbatar da cewa babu bambance-bambance tsakanin albashin ma’aikatan gwamnatin tarayya da masu aiki da gwamnatin jiha."

"Daga ranar 1 ga watan Disamba, likitocin da ke aiki da gwamnatin jihar Borno za su karɓi albashi daidai da na masu aiki da gwamnatin tarayya."

- Gwamna Babagana Umara Zulum

Abin a yaba ne

Wani mazaunin garin Biu a jihar Borno, mai suna Aliyu Biu, ya shaidawa Legit Hausa cewa matakin ƙarawa likitocin albashi abin a yaba ne.

Kara karanta wannan

Gwamna ya roki 'yan kwadago su hakura da shiga yajin aiki

"Wannan abin a yaba ne domin zai rage hijirar da likitocin da ke aiki da gwamnatin jiha suke yi zuwa ɓangaren gwamnatin tarayya."

"A da abin da ake biyansu ba wani abu ba ne mai yawa wanda hakan ya sa ba su son zama, amma ina ganin a yanzu wannan matakin zai rage yawan tafiyar da suke yi."

- Aliyu Biu

Zulum ya biya malaman makaranta sabon albashi

A wani labarin kuma, kun ji cewa malaman makarantun firamare a jihar Borno sun fara karɓar sabon mafi ƙarancin albashi na N70,000.

Malaman makarantun firamare a jihar sun yi murna a ranar Juma’a, 8 ga watan Nuwamba yayin da Gwamna Babagana Umara Zulum ya amince da aiwatar da mafi ƙarancin albashi na N70,000.

Asali: Legit.ng