'An Gyara Layukan Wutar,' TCN Ya Fadi Halin da Lantarkin Arewa Take ciki Yanzu

• Kamfanin dakon lantarki na Najeriya (TCN) ya dawo da wuta zuwa layin 330kV na Ugwuaji-Apir bayan an tu gyare-gyare
• TCN ya bayyana cewa dawo da wuta a kan layin zai inganta samar da wutar lantarki a Arewa maso Gabas da Arewa ta Yamma
• Legit Hausa ta ji ta bakin wasu mazauna Kaduna kan ko wutar lantarki ta dawo jihar bayan rahoton da TCN

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Abuja - Kamfanin wutar lantarki na Najeriya (TCN) ya sanar da dawo da wutar lantarki a layin wutar Ugwuaji-Apir mai ƙarfin 330kV.

A ranar 22 ga Oktoba, TCN ta bayar da rahoton rashin wuta a Arewa maso Gabas da Arewa maso Yamma, sakamakon matsala a layukan lantarki biyu.

TCN ya gayara wutar lantarkin Arewa

Bayan kwanaki biyu, ma’aikatan TCN sun gano matsalar da ta janyo ƙarancin wuta a layukan wutar guda biyu tare da fara aikin gyarawa, inji rahoton The Cable.

Kara karanta wannan

Injiniya ya nuna shakku kan dalilin yawan lalacewar layin wutar lantarki

A ranar 30 ga Oktoba, TCN ta dawo da wuta a jihohi bakwai na Arewa ta dayan layin, wanda ya ba da damar samun wuta a wadannan wurare.

A sanarwar baya-bayan nan, Ndidi Mbah, mai magana da yawun TCN, ta tabbatar da dawo da wuta a ragowar layin a ranar Alhamis.

Arewa za ta samu karuwar wuta - TCN

Ndidi Mbah ta ce yanzu da wuta ta dawo kan layukan biyu, kamfanonin rarraba lantarki na Jos, Kaduna, Kano, da Yola za su samu karin wutar.

Ta kuma ce, “TCN ta kammala gyare-gyaren layin da aka lalata, wanda ya bai wa injiniyoyinmu damar dawo da wutar."

Yanzu haka, tashoshin lantarki na Apir da Jos sun fara karɓar karin lodin wuta, wanda zai samar da karuwar wuta ga yankunan da abin ya shafa.

TCN ya aika sako ga mutanen Arewa

Layukan wutar Ugwuaji-Apir ya daina aiki tun daga ranar 21 ga Oktoba, sakamakon lalacewar wayoyin wutar, kafin a gyara tare da mayar da wuta kan layin farko.

Kara karanta wannan

Za a rage zama a duhu, TCN ya ƙara hasken wutar lantarki a jihohin Arewa 4

Yanzu da aka layi na biyu ya samu wuta, dukkanin layukan suna aiki, wanda zai inganta samar da wuta a Arewa maso Gabas da Arewa maso Yamma.

Ndidi Mbah ta gode wa jama’ar yankunan da abin ya shafa saboda hakurinsu a wannan mawuyacin yanayi na rashin wuta, tana mai jinjinawa juriyar da suka nuna.

Wuta ta dawo jihar Kaduna? Legit Hausa ta ji ta bakin wasu mazauna Kaduna kan ko wutar lantarki ta dawo jihar bayan rahoton da kamfanin TCN ya fitar. Hajiya Maryama Baba Bala daga Malali, ta ce wutar lantarki ta dawo amma har yanzu ba ta kai ga daidaituwa ba. Hajiya Maryama ta ce an samu raguwar awannin da ake samun wutar, inda wasu ranakun sai tsakar dare ake dawo da wutar. Shi kuwa Ya'u Shareef da ke Anguwar Sanusi ya ce sukan iya wuce awa 24 ba tare da ganin kyallin wutar lantarkin ba. Ya'u Shareef ya ce dama anguwarsu na fuskantar matsalar rashin wutar tun kafin ta lalace, amma yanzu abin ya kara ta'azzara.

Kara karanta wannan

'Yan bindiga sun maida hannun agogo baya, sun kai hari tashar wutar lantarki a Arewa

'Abin da ya jawo lalacewar wuta' - TCN

Tun da fari, mun ruwaito cewa kamfanin TCN ya ce layukan samar da wuta na daya da na biyu masu karfin 330kV na Ugwaji-Apir sun samu matsala.

A cewar TCN, wannan matsalar da aka samu ce ta jawo daukewar wutar lantarki a jihohin Arewacin Najeriya amma injiniyoyin kamfanin na aikin gyarawa.

Muhammad Malumfashi, babban edita a sashen Hausa na Legit ya duba labarin.

Asali: Legit.ng