Zanga Zanga Ta Barke a Majalisa, An Bukaci Tinubu Ya Dauki Mataki kan Mele Kyari

• Gungun masu zanga-zanga sun durfafi Majalisar Tarayya domin bukatar a kori shugaban kamfanin NNPCL, Mele Kyari
• Matasan da ke wakiltar kungiyoyi sun bukaci Bola Tinubu ya gargadi Kyari kan tsare-tsare da za su jefa al'umma cikin kunci
• Hakan na zuwa ne yayin da ake zargin Kyari da kawo tsare-tsare da ke sake jefa yan Najeriya cikin mawuyacin hali

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

FCT, Abuja - Masu zanga-zanga sun fantsama kusa da Majalisar Tarayya da ke birnin Tarayya Abuja.

Masu zanga-zangar sun bukaci a binciki shugaban kamfanin NNPCL, Mele Kyari kan kawo cikas a harkokin mai.

An roki Bola Tinubu ya kori Mele Kyari

Kara karanta wannan

Bidiyon lokacin da Tinubu ya isa birnin Riyadh, zai halarci manyan tarurruka 2

Punch ta ce kungiyoyin da suke zanga-zangar suka ce Mele Kyari bai tsinana komai ba wurin inganta ɓangaren mai a ƙasar.

Zanga-zangar da aka yi ta a kusa da Majalisar Tarayya da dauki hankulan al'umma da ke kewayen, The Guardian ta ruwaito.

Mai magana da yawun kungiyar, Segun Adebayo ya bukaci Bola Tinubu ya gargadi Kyari kan kawo tsare-tsare da za su jefa al'umma cikin kunci.

Korafe-korafen da ake yi kan Mele Kyari

"Duk da yiwuwar tace mai daga matatunmu na gida, wasu sun gwammace a cigaba da shigo da mai daga ketare domin biyan buƙatarsu."

"Shigo da mai ba karamin asarar daloli ke jawowa ba wanda daga bisani ke komawa kan talakawa yayin da tsiraru ne ke cin gajiyar."

"Akwai wadanda ke fifita abin da za su samu fiye da cigaban ƙasa, irinsu ke kawo cikas ga samun cigaba a Najeriya."

Kara karanta wannan

Sabuwar matsala ta afkawa Ganduje kan bidiyon dala, an tono wasu zarge zarge

- Segun Adebayo

Legit Hausa ta yi magana da mai kasuwancin mai

Wani mai harkar siyar da mai ya fadawa Legit Hausa abin da yake gani kan zanga-zangar da ta barke a Abuja.

Muhammad Hassan wanda ke kasuwancin mai ya ce tabbas komai ya tabarbare kan irin matakan da bangaren man ke dauka.

Muhammad ya goyi bayan daukar mataki kan Mele Kyari inda ya ce suna tafka asara da rashin ciniki fiye da tunanin mutum.

Ya yi fatan samun saukin man fetur inda ya ce tsadar tana matukar taba musu kasuwa saboda rashin ciniki.

Zanga-zanga ta barke a hedikwatar NNPCL

Kun ji cewa masu zanga-zanga sun cika hedikwatar kamfanin NNPCL a Abuja inda suka bukaci kawo sauyi tattare da harkokin mai.

Matasan da ke zanga-zangar sun bukaci Mele Kyari ya yi gaggawar ajiye aikinsa na shugaban kamfanin NNPCL saboda gazawa.

Hakan ya biyo bayan korafe-korafe kan tashin farashi da yawan layi da ake samu a gidajen mai da kuma halin kunci da aka shiga.

Muhammad Malumfashi, babban edita a sashen Hausa na Legit ya duba labarin.

Asali: Legit.ng