Rai Ya Yi Halinsa: Shugaban Karamar Hukuma Ya Yi Mutuwar Bazata, an Samu Bayanai

• Al'ummar karamar hukumar Onigbongbo a jihar Lagos sun shiga jimami bayan rasuwar shugabansu a yau Asabar
• Marigayin mai suna Oladotun Olakanle ya rasu ne da safiyar yau Asabar 2 ga watan Nuwambar 2024 a jihar
• Rahotanni sun tabbatar da cewa wannan shi ne karo na biyu da shugaban karamar hukumar Onigbongbo ke rasuwa a kan mulki

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Lagos - An shiga rudani a jihar Lagos bayan mutuwar bazata da shugaban karamar hukuma ya yi cikin wani irin yanayi.

Hakan ya faru ne bayan rasuwar shugaban karamar hukumar Onigbongbo, Oladotun Olakanle a yau Asabar 2 ga watan Nuwambar 2024.

Kara karanta wannan

Majalisar dokoki ta dakatar da shugaban ƙaramar hukuma kan wani bidiyon rashin ɗa'a

Lagos: Yaushe shugaban karamar hukumar ya rasu?

Vanguard ta ce marigayin ya rasu ne da safiyar yau Asabar 2 ga watan Nuwambar 2024 yana da shekaru 54 a duniya.

Sai dai har zuwa lokacin tattara wannan rahoto ba a tabbatar da silar mutuwar dan siyasar ba da hargitsa al'ummar yankinsa a jihar.

Rahotanni sun tabbatar cewa marigayin ya halarci bikin binne jigon APC, Dakta Adesola Taiwo a ranar 31 ga watan Oktoban 2024.

Har ila yau, a jiya Juma'a 1 ga watan Nuwambar 2024 ya raba motoci ga rundunar yan sanda a karamar hukumar domin dakile matsalar tsaro.

Yadda tarihi ya maimaita kansa a karamar hukumar

Wannan shi ne karo na biyu da shugaban karamar hukumar Onigbongbo mai ci ke mutuwa a wa'adinsu na biyu a jihar Lagos.

Kaifin rasuwar Oladotun Olakanle, wanda ya sauka ya ba shi kujerar, Babatunde Oke shi ma ya rasu a wa'adinsa na biyu sanadin annobar Covid-19, cewar rahoton PM News.

Kara karanta wannan

An ƙara babban rashi a Najeriya, tsohon ɗan Majalisa ya riga mu gidan gaskiya

Kwara: Tsohon dan Majalisar Tarayya ya rasu

Kun ji cewa ana jimamin rasuwar tsohon shugaban hukumar zabe, an sake rashin tsohon dan Majalisar Tarayya daga jihar Kwara.

Marigayin, Hon. Aliyu Ahman- Pategi shi ne ya wakilci mazabar Edu/ Patigi a jihar Kwara na tsawon shekaru 12.

An tabbatar da cewa marigayin ya rasu ne a ranar Alhamis 24 ga watan Oktoban 2024 yana da shekaru 59 a duniya.

Asali: Legit.ng