'Ana Talaucewa,' Sanatan APC Ya Bukaci a Kara Albashi Sama da N70,000

• Tsohon gwamnan jihar Edo kuma Sanata a APC, Adams Oshiomhole ya koka kan yadda ma'aikatan Najeriya ke kara talaucewa
• Adams Oshiomhole ya ce rashin biyan ma'aikata kudin da zai wadace su rayuwa yana iya zama barazana ga tsaron Najeriya
• Legit ta tattauna da wani ma'aikaci a jihar Gombe, Aminu Hassan domin jin ra'ayinsa a kan maganar Adams Oshiomhole

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja - Tsohon shugaban kwadago kuma Sanata a APC, Adams Oshiomhole ya koka kan albashin ma'aikata.

Adams Oshiomhole ya ce duk da an yi karin albashi amma hakan ba zai tabuka komai ga ma'aikata ba.

Jaridar Vanguard ta wallafa cewa Oshiomhole ya yi bayani ne yayin wani taro a birnin tarayya Abuja.

Kara karanta wannan

Ma'aikata sun zuba ido kan fara karbar sabon albashi, NLC za ta jajubo aiki

Ma'aikata na talaucewa inji Oshiomhole

Jigo a APC, Sanata Adams Oshiomhole ya ce a halin yanzu kullum ma'aikata na kara talaucewa a Najeriya.

Adams Oshiomhole ya ce duk da an yi karin albashi ma'aikata sun kara shiga talauci a kan yadda suke walwala a baya.

Oshiomhole ya bukaci karin albashin ma'aikata

Sanata Oshiomhole ya bukaci gwamnati ta karawa ma'aikata albashin da ya haura N70,000, ya ce duk jihar da za ta iya ta karawa ma'aikata kudi.

Punch ta ruwaito cewa Oshiomhole ya bayyana cewa ya taba tilasata Bola Tinubu ya karawa ma'aikata kudi a kan mafi karancin albashi a lokacin da yake gwamnan Legas.

Illar ba ma'aikata albashi kaɗan

Sanata Adams Oshiomhole ya ce rashin ba ma'aikata albashi da zai wadace su zai shafi harkokin tsaron kasa.

Haka zalika ya kara da cewa idan ma'aikata ba su samun kudin da zai iya wadatar da su ba lallai tattalin arzikin kasa ya haɓaka ba.

Kara karanta wannan

Sanata ya tada hankalin Gwamna Abba, ya ce jam'iyyar APC za ta ƙwace Kano a 2027

Oshiomhole ya bukaci daidaita albashi

Adams Oshiomhole ya ce idan aka saka albashi mai yawa ma'aikata za su rasa aiki haka kuma idan ya yi kadan za su shiga matsala.

A karkashin haka, ya bukaci a samu mafi ƙarancin albashi da zai zama tsaka tsakiya ta inda gwamnati da ma'aikata ba za su cutu ba.

Legit ta tattauna da Aminu Hassan

Wani ma'aikaci a jihar Gombe, Aminu Hassan ya zantawa Legit cewa kudin da ake biya ba zai wadatar ba ko da an yi kari zuwa N70,000.

Ma'aikacin ya ce akwai bukatar ba ma'aikata kudi da zai wadatar da su domin su rika aiki yadda ya kamata.

Abba ya kara albashin ma'aikatan Kano

A wani rahoton, kun ji cewa gwamnan jihar Kano, Abba Kabir Yusuf ya shiga sahun gwamnonin da suka ayyana mafi ƙarancin albashin ma'aikata.

Abba Kabir Yusuf ya bayyana cewa ma'aikatan jihar Kano za su rika karbar N71,000 a matsayin sabon mafi ƙarancin albashi.

Muhammad Malumfashi, babban edita a sashen Hausa na Legit ya duba labarin.

Asali: Legit.ng