Matan da Za Su Shiga Gwamnatin Bola Tinubu bayan Sauyi a Majalisar FEC
Abuja - Shugaba Bola Ahmed Tinubu ya yi sauyi a majalisar zartarwa, ya kori wasu kuma ya kara wasu ministocin gwamnatinsa.
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
M. Malumfashi ya shafe shekaru ya na kawo labaran Hausa musamman na siyasa, addini, tarihi, wasanni da al’ada
Fadar shugaban kasa ta sanar da Bianca Odumegwu-Ojukwu a matsayin minista da aka yi canji a majalisar zartarwa da ake kira FEC.
Mun yi kokarin tattaro bayanai game da matan da aka zaba domin su zama ministoci.
Asali: UGC
Gwamnatin Tinubu da mata a Najeriya
Kafin nan shugaba Bola Tinubu ya yi waje da Uju Kennedy-Ohanenye wanda ta rike kujerar ministan harkokin mata a gwamnati.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Uju Kennedy-Ohanenye ta yi ta jawowa gwamnatin Tinubu abin magana a tsawon lokacin da ta rike kujerar daga 2023 zuwa 2024.
A gefe guda akwai irinsu Dr. Mariya Bunkure wanda har gobe ta na kan kujerar karamar ministan harkokin birnin tarayya Abuja.
Mariya Bunkure ta canji Maryam Shetty wanda aka cire sunanta a lokacin da ta ke sa ran za a tantance ta a matsayin minista a majalisa.
A matan da suka tsira akwai Hannatu Bala Musa wanda RFI ta ce a watan Yuni aka nada ta mai ba shugaban kasa shawara ta musamman.
Daga baya ta zama minista ta fuskar tattalin arziki a fannin al’adu da nishadi. Sai dai wannan karo an ragewa ma'aikatarta karfi a Najeriya.
Akwai Iman Suliman Ibrahim wanda tsohon shugaba Muhammadu Buhari ya nada ta Darakta-Janar ta hukumar yaki da fataucin bil Adama.
Yanzu an canzawa Iman Suliman Ibrahim ma'aikata, ta zama ministar harkokin mata.
Matan da za su zama ministoci
1. Suwaiba Said Ahmad
Dr. Suwaiba Said Ahmad ta na cikin wadanda za su iya shiga majalisar FEC, ta kware a harkar malanta da kwatowa mata hakkokinsu.
Malama ce a jami’ar Bayero da ke Kano da ta rike mukamai dabam-dabam. Bayan nan ta yi aikin bincike da manyan kungiyoyin duniya.
A shafinsa na Facebook, Farfesa Abdallah Uba Adamu ya bayyana cewa da farko ta yi sha’awar zama likita ne amma ta kasance malama.
Idan an tantance ta a majalisar dattawa, za ta zama karamar minister ilmi ta na da shekaru 43 da haihuwa, kusan ‘yar auta a cikin mata.
2. Bianca Odumegwu-Ojukwu
Ita Bianca Odumegwu-Ojukwu jakada ce kuma za a iya kiranta lauya sannan ‘yan kasuwa bayan kasancewarta sarauniyar kyau a Najeriya.
A shekarar 2011, shugaba Goodluck Jonathan ya nada Bianca Odumegwu-Ojukwu a matsayin mai ba shi shawara kan harkokin 'yan ci-rani.
Kafin ta zama jakadar Najeriya a kasashen Ghana da Sifen kafin zama wakiliyar Najeriya a kungiyar bude ido majalisar dinkin duniya.
Bola Tinubu ya na so mai dakin ta Chukuemeka Odumegwu-Ojukwu ta zama karamar ministar harkokin waje karkashin Yusuf Tuggar.
3. Dr. Jumoke Oduwole
Dr. Jumoke Oduwole za ta canji tsohuwar ministar masana’antu, kasuwanci da zuba hannun jari kamar yadda sanarwa ta gabata.
Jaridar Nairametrics ta ce kafin zabenta, ta na cikin masu taimakawa mataimakin shugaban kasa kuma ita ce hadima a bangaren PEBEC.
Jumoke Oduwole ta fara karatun ilmin shari’a ne a jami’ar Legas. Daga baya sai ta je jami’o’in Cambridge, Stanford da Oxford a waje.
Lokacin da gwamnatin Muhammadu Buhari ta yi kokarin saukaka kasuwanci, magajiyar Doris Nkiruka Uzoka-Anite ce ta rike sakatare.
INEC ta yi shugabanni 4 a watanni 3
Ana da labarin yadda Goodluck Jonathan ya nada Farfesa Attahiru Jega a 2010 wanda ya yi wa’adi sau biyu sai ya sauka a Yulin 2015.
Lokacin da Attahiru Jega zai bar ofis, sai ya zabi Ahmad Wali ya zama shugaban rikon kwarya daga nan aka kawo Amina Zakari.
Legit ta tuno lokacin da jami’ai hudu (4) suka shugabanci hukumar INEC a 2015.
Asali: Legit.ng
