Yadda Hukumar EFCC Ta Kwato Sama da N200bn cikin Shekara 1

• Hukumar EFCC mai yaƙi da cin hanci da rashawa a Najeriya ta samu nasarar ƙwato maƙudan kuɗi a hannun ɓarayi
• EFCC ta ƙwato sama da N200bn a shekara ɗaya a ƙarƙashin jagorancin Ola Olukoyede wanda ya fara aiki a Oktoban 2023
• Kakakin hukumar EFCC da ya bayyana hakan ya ce an kuma yankewa mutane 3000 hukunci waɗanda aka samu da laifi

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

FCT, Abuja - Hukumar da ke yaƙi da masu yi wa tattalin arziƙin ƙasa zagon ƙasa (EFCC), ta kwato sama da N200bn a cikin shekara ɗaya.

EFCC ta kuma samu nasarar sanyawa kotuna su yankewa mutane kusan 3,000 hukunci a shekara ɗaya a ƙarƙashin jagorancin Ola Olukoyede.

Kara karanta wannan

Ganduje ya gigita PDP ya fadi yankin da jam'iyyar APC za ta kwace

Kakakin hukumar EFCC, Wilson Uwujaren ne bayyana hakan yayin wata hira da tashar Channels tv a shirinsu na 'Morning Brief' a ranar Litinin.

Shugaba Bola Tinubu ya naɗa Ola Olukoyede a matsayin shugaban hukumar EFCC a watan Oktoban 2023.

Hukumar EFCC ta samu nasarori

Wilson Uwujaren ya ce tun daga wannan lokacin hukumar EFCC ta samu nasarori a yaƙi da cin hanci da rashawa a ƙasar nan.

"Dangane da batun ƙwato kuɗi da yanke hukunci waɗanda su ne abin da manema labarai suka fi so, ya yi ƙoƙari sosai a cikin shekara ɗaya."

"Dangane da ƙwato kuɗi, mun ƙwato sama da N200bn a cikin shekara ɗaya a ƙarƙashin jagorancin Ola Olukoyede."

"A hakan babu batun kwatanta adadin kuɗin da ƙwato a Dala ko Yuro. Ƙuɗaɗen suna da matuƙar yawan gaske."

Kara karanta wannan

Tsohon SSG ya fadi abin da ya dace 'yan Najeriya su yi wa Tinubu kan tsadar rayuwa

- Wilson Uwujaren

Me EFCC ta fi maida hankali a kai?

Duk da waɗannan nasarorin da aka samu, kakakin na EFCC ya ce hukumar ta mayar da hankali ne kan hana aikata laifuka maimakon yanke hukunci.

A cewarsa, akasarin hukuncin da aka yanke, an zartar da su ne kan laifukan yanar gizo ne inda matasa ke da kaso mafi yawa.

Kotu ta hana EFCC yin bincike

A wani labarin kuma, kun ji cewa shugaban hukumar yaƙi da cin hanci da rashawa (EFCC), Olanipekun Olukoyede ya nuna cewa an samu koma baya a ayyukanta.

Olanipekun Olukoyede ya ce EFCC ba za ta iya gudanar da bincike a wasu jihohi 10 na Najeriya ba, sakamakon takunkumin da kotu ta saka mata.

Asali: Legit.ng