Gwamna Zai Fara Biyan Albashin N70,000 a Oktoba, Dalibai Za Su Yi Karatu Kyauta

• Yayin da rayuwa ke kara tsada duk kwanan duniya a Najeriya, Gwamna Charles Soludo zai biya sabon albashi
• Gwamna Soludo ya amince da fara biyan sabon mafi karancin albashin N70,000 a karshen wannan watan Oktoba
• Soludo ya ce ya dauki matakin ne domin saukakawa ma'aikata kuma zai samar da ilimi kyauta ga daliban sakandare

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Anambra - Gwamna Charles Soludo na jihar Anambra ya shirya biyan mafi karancin albashi na N70,000.

Charles Soludo ya yi alkawarin fara biyan sabon albashin a karshen wannan wata da muke ciki na Oktoba.

Gwamna Soludo zai fara biyan albashin N70,000

Gwamnan ya bayyana haka ne yayin taron cikan Najeriya shekaru 64 da samun yancin kai, cewar Tribune.

Kara karanta wannan

Najeriya @64: Muhimman abubuwa 5 da Tinubu zai yi domin ceto kasa a halin kunci

Farfesa Soludo ya ce zai ba da mafi karancin albashi a karshen watan nan da kuma ilimi kyauta domin taba kowane bangare na al'umma.

Ya ce ya dauki wannan mataki ne duba da halin da al'umma ke ciki na matsin rayuwa da tattalin arziki.

Soludo ya kuma sanar da cewa za a fara ba manyan dalibai da ke makarantar sakandare ilimi kyauta, cewar rahoton Punch.

Gwamna ya ba tabbaci kan halin kunci

"Mun taru a nan domin bikin cika Najeriya shekaru 64 da samun yancin kai duk da kalubalen da muke fuskanta."

"Kalubalen da yawa amma duk da haka ina mai tabbatar muku da cewa komai zai daidata, ina hango jin dadi a gaba."

- Charles Soludo

Hakan na zuwa ne yayin da rahotanni suka tabbatar da cewa Gwamnatin Tarayya ta fara biyan mafi karancin albashi inda wasu ma'aikata suka musanta.

Kara karanta wannan

Muhimman abubuwan tunawa 3 da suka faru a ranar da Najeriya ta samu ƴancin kai

Wani ma'aikacin gwamnatin jihar Gombe ya fadawa Legit Hausa halin da suke ciki yayin da wasu gwamnoni suka fara biyan mafi ƙarancin albashi.

Umar Abdulkadir ya ce har yanzu ba su san matakin da suke ba duk da kafa kwamiti kan mafi ƙarancin albashin.

Ya roki gwamna Inuwa Yahaya da ya yi duba zuwa ga halin da ma'aikata ke ciki saboda tsadar rayuwa a Najeriya.

Tinubu ya kasafta sabon albashin N70,000

Kun ji cewa Gwamnatin Tarayya ta fitar da jadawalin yadda kowane ma'aikaci zai samu a sabon mafi ƙarancin albashin da aka kawo.

An kasafta tsarin yadda ma'aikatan gwamnati za su samu albashi har na tsawon shekara bayan karin kudin da aka yi masu.

Muhammad Malumfashi, babban edita a sashen Hausa na Legit ya duba labarin.

Asali: Legit.ng