An Shiga Fargaba, Masu Zanga Zanga Sun Saci Bindigogi da Kudi a Kano

• Yayin da aka shiga kwana na biyar na gudanar da zanga-zanga a fadin kasar nan, an fara gano asarar da masu fitowa nuna fushinsu su ka jawo
• Ma'aikatar shari'a ta jihar Kano ta gano yadda masu zanga-zangar da su ka afka mata su ka tafka barna ta hanyar yin sace-sace da kone-kone
• Daga cikin abubuwan da aka sata akwai bindigu da aka kwato daga hannun wasu da ake zargi da aikata mugayen laifuka a jihar

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

Jihar Kano - Ma'aikatar shari'a ta Kano ta tafka asara bayan masu zanga-zanga sun kutsa cikinta tare da sace muhimman abubuwa da kona dukiyoyin jama'a. Daga cikin abubuwan da aka sace akwai takardun tuhuma, kudi da bindigu da aka kama a matsayin shaida daga hannun masu garkuwa da mutane.

Kara karanta wannan

Zargin kashe masu zanga zanga: Gwamnatin Kano za ta kafa kwamitin bincikar jami'an tsaro

Jaridar The Punch ta wallafa cewa jami'in hulda da jama'a na babbar kotun jiha, Baba Ibrahim ne ya tabbatar da sace-sacen a Kano.

Masu zanga-zanga sun tafka barna

Kakakin ma'aikatar shari'a ta Kano, Baba Ibrahim ya bayyanawa manema labarai cewa an fara binciken wadanda su ka kutsa ma'aikatar tare da sace muhimman abubuwa.

Naija News ta tattaro cewa a ranar Alhamis ne bara-gurbin cikin masu zanga-zanga su ka shiga ma'aikatar tare da sace kudi masu yawa da kona ababen hawa.

Ana binciken masu zanga-zanga a Kano

Wannan shi ne karon farko da ma'aikatar shari'a ta Kano ta taba fuskantar makamanciyar asarar da aka gani a lokacin zanga-zanga

Baba Ibrahim ya ce tuni aka kafa kwamitin bincike domin gano ainihin wadanda su ka yi sace-sacen domin a hukunta su.

Kara karanta wannan

Sarki Muhammadu Sanusi II ya fadi abin da za ayi da kayan 'ganimar' zanga-zanga

'Yan daba sun tarwatsa masu zanga-zanga

A wani labarin kun ji cewa 'yan daba sun tarwatsa masu gudanar da zanga-zangar adawa da manufofin shugaban kasa, Bola Ahmed Tinubu a Legas.

'Yan daban sun bayyana dalilin tarwatsa masu zanga-zangar da cewa shugaban kasa ya riga ya yiwa mutane jawabi, saboda haka kowa ya koma gidansa.

Muhammad Malumfashi, babban edita a sashen Hausa na Legit ya duba labarin.

Asali: Legit.ng