Gwamna Ya Gana da Masu Shirin Yin Zanga Zanga, Ya Shata Layin da Ba Ya So a Ƙetare

• Gwamna Ademola Adeleke ya ja kunnen masu shirin zanga-zanga su guji duk abin da zai kawo tashin hankali a jihar Osun
• Gwamnan ya bayyana cewa duk da ƴan Najeriya na da ƴancin yin zanga-zanga amma gwamnatinsa ba za ta lamunci a riguza zaman lafiya ba
• Adeleke ya yi wannan gargaɗi ne yayin ganawa da masu shirya zanga-zangar da za a yi a gidan gwamnatinsa da ke Osogbo

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Jihar Osun - Gwamna Ademola Adeleke na jihar Osun ya buƙaci masu shirya zanga-zangar da za a fara ranar 1 ga Agusta su yi ta cikin kwanciyar hankali da lumana.

Gwamnan ya gargaɗi masu ruwa da tsaki a zanga-zangar da cewa gwamnatinsa ba za ta lamunci duk wani abu da zai tada zaune tsaye ba a lokacin.

Kara karanta wannan

Ana sauran kwana 2, zanga zanga ta gamu da gagarumin koma baya a Arewa

Adeleke ya yi wannan kashedi ne a wata sanarwa da kwamishinan yaɗa labarai na jihar Osun, Kolapo Alimi ya fitar ranar Talata, kamar yadda Vanguard ta rahoto.

Adekele ya gana da masu shirin zanga-zanga

Sanarwar ta ce gwamnan ya yi gargaɗin ne a lokacin wani taro da masu shirya zanga-zangar da kungiyoyin fararen hula da jami’an tsaro a gidan gwamnatinsa.

Adeleke wanda mataimakinsa, Kola Adewusi ya wakilta a wurin taron ya ce zanga-zangar hakki ne na ƴan Najeriya wanda ba ba zai yiwu a tauye masu ba.

Amma ya jaddada cewa ba zai yi wu a fake da ita ba wajen ruguza zaman lafiya da kwanciyar hankalin jihar ba, cewar rahoton Punch.

Zanga-zanga: Gwamnan jihar Osun ya shata layi

A cewar Gwamna Adeleke, zaman lafiya da kwanciyar hankali a jihar Osun shi ya fi kamata ya zama abu mafi muhimmanci yayin gudanar da zanga-zangar.

Kara karanta wannan

Gwamna ya zargi wasu manyan mutane da ɗaukar nauyin zanga zangar da ake shirin yi

“Don haka ina rokonku da ku kasance masu bin doka da oda kafin, lokacin da kuma bayan zanga-zangar da za a yi a fadin ƙasar nan, domin ba za mu lamunci tashin hankali ba," in ji shi.

Kungiyoyi sun janye shiga zanga-zanga

A wani labarin, an ji Matasan Najeriya sun kara gamuwa da cikas a shirinsu na fara zanga-zangar adawa da manufofin gwamnati da suka jawo tsadar rayuwa.

Kungiyoyi da dama a Arewacin Najeriya sun sanar da janyewa daga zanga-zangar ranar Litinin saboda abin da suka alaƙanta da barazanar tsaro.

Muhammad Malumfashi, babban edita a sashen Hausa na Legit ya duba labarin.

Asali: Legit.ng