Tinubu Ya Rikita Najeriya da Mukamai, Ya Sake Nada Dan Tsohon Gwamna a Arewa Mukami

• Shugaban kasa Bola Tinubu ya yi ruwan mukamai a jiya Asabar 13 ga watan Yulin 2024 a hukumomi daban-daban
• Shugaban ya nada dan tsohon gwamnan jihar Kwara, Cornelius Oluwasegun Adebayo a matsayin shugaban NALDA
• Hadimin shugaban a bangaren yada labarai, Ajuri Ngelale shi ya bayyana haka a cikin wata sanarwa da ya fitar a jiya Asabar

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

FCT, Abuja - Shugaba Bola Tinubu ya amince da nadin dan tsohon gwamnan jihar Kwara, Cornelius Oluwasegun Adebayo mukami.

Tinubu ya nada Adebayo ne a matsayin shugaban hukumar ci gaban harkokin noma da aka fi sani da NALDA.

TinUbu ya nada sabon shugaban hukumar NALDA

Wannan na kunshe ne a cikin wata sanarwa da hadimin shugaban, Ajuri Ngelale ya fitar a shafinsa na Facebook a jiya Asabar 13 ga watan Yulin 2024.

Kara karanta wannan

Kano: Bayan nadin Dan Agundi, Tinubu ya nada surukin Ganduje babban muƙami

Adebayo 'da ne ga tsohon gwamnan Kwara, Cif Cornelius Adebayo wanda ya mulki jihar a shekarar 1983.

Shugaban ya bukaci Adebayo da ya yi amfani da kwarewarsa wurin tabbatar kawo ci gaba a hukumar da kuma bangaren noma baki daya.

"Shugaba Tinubu ya bukaci shugaban hukumar NALDA da ya yi mafani da kwarewarsa da hikima wurin kawo ci gaba a harkokin noma."

- Ajuri Ngelale

Tinubu ya nada surukin Ganduje mukami

Wannan na zuwa ne bayan nadin surukin tsohon gwamnan jihar Kano, Abdullahi Ganduje a matsayin hadimi na musamman ga shugaban.

Tinubu ya amince da nadin Idris Ajimobi a matsayin hadiminsa na musamman a bangaren kula da kiwon dabbobi.

Nadin na zuwa ne bayan kirkirar sabuwar ma'aikata a Abuja da za ta kula da ci gaban noma da kuma kiwon dabbobi.

Tinubu ya nada Dan Agundi mukami

Kara karanta wannan

Batun gyara ake: Tinubu ya sake kora a hukumomi, ya nada sabbin shugabanni a PenCom, NSITF

A wani labarin, kun ji cewa Shugaba Bola Tinubu ya nada Baffa Dan Agundi a matsayin shugaban hukumar kula da nagartar ayyuka.

Tinubu ya amince da nadin ne ta bakin hadiminsa a bangaren yada labarai, Ajuri Nglale a jiya Asabar 13 ga watan Yulin 2024.

Shugaban ya kuma amince da nadin tsohon sanatan Kano ta Tsakiya, Bashir Lado a matsayin hadiminsa a Majalisar Dattawa.

Asali: Legit.ng