Ana Cikin Matsalar Abinci, Sarkin Katsina Ya Shiga Sahu, Ya Jagoranci Sallar Roƙon Ruwa

• Sarkin Katsina, Mai martaba Abdulmimin Kabir Usman ya jagoranci dubban jama'a zuwa yin sallar roƙon ruwa
• Hakan yana zuwa ne yayin da ake tsaka da matsalar tsaro da ƙaruwar farashin kayan masarufi a kusan duk Najeriya
• Legit Hausa ta tattauna da wasu mazauna yankin Faskari, inda ke fama da matsalar tsaro kan daminar bana da kuma rashin ruwa.

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Katsina - A ƙoƙarin shawo kan matsalar abinci da rashin tsaro da suka addabi Katsina, Sarkin Katsina, Abdulmumini Usman, ya jagoranci dandazon jama'a zuwa yin sallar roƙon ruwa.

An yi sallar ne a filin idi, wanda babban limamin babban masallacin jihar Katsina, Imam Gambo Mustapha ya jagoranta.

Kara karanta wannan

Shinkafi ya fadi abin da ke kawo rashin tsaro a Arewa maso Yamma, ya ba da mafita

An nemi jama'an Katsina su tsananta addu'o'i

Jaridar Punch ta rahoto cewa, an yi kira ga mazauna jihar da su tsananta addu'o'i domin samun amfanin gona mai kyau a wannan daminar.

Haka zalika, an yi kira ga al'ummar jihar da su roki Allah ya kawo sauki ga tsadar rayuwa, saukin kayan abinci da kuma kawo karshen matsalar tsaro a jihar.

Ɗaya daga cikin waɗanda suka yi sallar mai suna Abdurrahman Bature, wanda ya zanta da Channels TV, ya jaddada tsananin buƙatar samun ruwan sama domin ceton amfanin gona.

Ya yi kira tare da tsawatarwa mazauna jihar da su ji tsoron Allah SWT a dukkanin lamuransu tare da kiyaye rayuwa mai nagarta.

"Laifuffuka na hana ruwan sama"

Bature ya kuma yi kira ga shugabannin da su yi mulkin gaskiya, inda yace matsalolin jihar da suka haɗa da ƙarancin ruwan sama da kashe-kashe suna da alaƙa da miyagun halayen jama'a.

Kara karanta wannan

Muhammadu Sanusi II ya faɗi yadda za a magance matsalolin da suka addabi Najeriya

Bature ya ce:

"Ko wannan kashe-kashen na babu gaira ba dalili na rayukan jama'a za su iya zama dalilin rashin ruwan sama har da miyagun ɗabi'u."

Wannan sallar rokon ruwan na zuwa ne yayin da 'yan Najeriya ke fama da ƙaruwar farashin kayayyaki wanda ya haura zuwa kashi 40.

Rashin ruwa da matsalar tsaro Faskari

Da muka tuntubi wasu manoma daga yankin Faskari, karamar hukumar da ke fama da 'yan bindiga a Katsina, sun ce har yanzu ruwa bai tsaya ba, ga 'yan bindiga sun addabe su.

Wani Auwalu Bala, ya shaidawa wakilinmu cewa duk wani shiri da ya kamata su yi a gonakinsu sun kammala, inda a yanzu ruwan saman kawai suke jira ya yi karfi.

Auwal Bala ya ce daminar bara ta yi albarka, domin an samu amfanin gona mai kyau don haka yana rokon Allah ya sanya wannan shekarar ma su samu albarkar gona sosai.

Kara karanta wannan

Borno: Majalisar dattawa ta faɗi sakacin da ya jawo aka kai harin bam a Gwoza

Wani Nababa Shu'aibu, shi kuma daga garin Daudawa, gundumar Faskari, ya ce har yanzu 'yan bindiga na shiga yankunan da ke makotaka da su, musamman ta yankin Sheme.

Ya roki gwamnati da ta kara inganta tsaro da zai ba manoman yankunan damar zuwa gonakinsu domin samun abinci a wannan damunar.

Gwamna ya ja jama'a zuwa rokon ruwa

A wani labari a can baya, mun ruwaito cewa gwamnan jihar Bauchi, Bala Abdulqadir Mohammed ya jagoranci mutane a wurin sallar rokon ruwa.

Da yake jawabi bayan an idar da sallar, Gwamna Bala Mohammed ya ce jama'ar jihar sun dade su na sa ran ruwan sama amma shiru bai sauka ba.

Muhammad Malumfashi, babban edita a sashen Hausa na Legit ya duba labarin.

Asali: Legit.ng