Fitattun Yan Siyasar Kano 2 Sun Kwanta Dama, Abba Gida-Gida Ya Yi Alhinin Rashinsu

• Al'ummar jihar Kano sun yi babban rashi na wasu manyan jiga-jigai biyu a siyasar jihar, a kwanan nan
• Gwamna Abba Kabir Yusuf na jihar Kano ya yi alhinin wannan rashi, inda ya bayyana mamatan a matsayin wadanda suka yi fafutuka wajen kwato yancin al'ummarsu
• Da yake mika ta'aziyya ga iyalinsu, Abba Gida-Gida ya roki Allah madaukakin sarki ya saka masu da aljannah madaukakiya

Aisha Musa ta shafe tsawon shekaru tana kawo labaran Hausa a bangaren siyasa, tsegumi da al’amuran yau da kullum

Kano, jihar Kano - Shahararren dan siyasar jihar Kano, Alhaji Hamza Abdu Farar Hula Bichi, ya rasu.

Haka kuma, Allah ya dauki ran Alhaji Wada Sinkin wanda shima shahararren dan siyasa ne a jihar ta Kano.

Jaridar Legit Hausa ta rahoto cewa Alhaji Hula Bichi fitacce ne a tsakanin yan siyasar Kano.

Kara karanta wannan

Ministan Abuja Wike ya yi kicibis da abokin karatunsa na sakanbdare, ya yi masa kyautar kudi a bidiyo

Abba Gida-Gida ya yi alhinin rashin fitattun yan siyasar Kano, Hula Bichi da Wada Sinkin

Marigayi Hula Bichi ya kasance jigo a fafutukar kwato yancin al'umma a jihar ta Arewa maso Yammacin Najeriya.

Da yake martani kan mutuwar fitattun yan siyasar, gwamnan na jihar Kano, Abba Kabir Yusuf, ya rubuta a shafinsa na X (wanda aka fi sani da Twitter a baya) a ranar Laraba, 10 ga watan Janairu:

“Ina mika ta’aziyya ga iyalan Alhaji Wada Sinkin da Alhaji Hamza Abdu Farar Hula Bichi kan rashinsu da aka yi a kwanan nan.

“Shahararrun ‘yan siyasan guda biyu sun yi fafutuka sosai wajen kwato ‘yancin al'ummarsu, kuma sun bar wani babban gibi da zai dauki lokaci mai tsawo kafin a cike shi.

"Allah madaukakin sarki ya saka musu da Jannatul Firdaus, Ameen."

Kara karanta wannan

Ana daf da yanke hukunci a Kano, Ganduje ya nemi alfarma daga 'yan adawa a jihar arewa

Babban malamin Musulunci ya rasu

A wani labarin kuma, mun ji cewa a a safiyar ranar Laraba ce aka samu labarin rasuwar babban malamin addinin Musulunci a jihar Kebbi.

Marigayi Sheikh Usman Abubakar Damana ya rasu a yau Laraba 3 ga watan Janairu a birnin Kebbi, cewar Dokin Karfe TV.

Kafin rasuwarshi, shi ne babban limamin masallacin Juma'an Geese Phase 1 da ke birnin Kebbi. Sshi ne mataimaki na biyu a kungiyar Izala a jihar Kebbi baki daya, cewar JIBWIS Gombe.

Asali: Legit.ng