Shugaba Tinubu Ya Bayyana Ministan Da Ya Yaba Da Kwazonsa Wajen Tantancewa a Majalisa

• Shugaban ƙasa Bola Tinubu ya yaba da kwazon da Farfesa Ali Pate ya yi lokacin da ake tantance shi a matsayin minista a majalisar dattawa
• Farfesa Pate yana daga cikin ministocin da Shugaba Tinubu ya miƙa zuwa ga majalisa domin tantancewa da amincewa da su
• Shugaban ƙasar ya yi wannan yabon ne lokacin da Pate ya raka Darekta Janar ta WTO, Dr Ngozi Okonjo-Iweala, zuwa fadarsa a ranar Talata

FCT, Abuja - Shugaban ƙasa Bola Tinubu ya yaba wa Farfesa Ali Pate, ɗaya daga cikin ministocin da majalisr dattawa ta amince da su, bisa kwazon da ya nuna a lokacin da ake tantance shi a majalisa.

Pate ya taɓa riƙe muƙamin ƙaramin ministan lafiya a ƙarƙashin gwamnatin tsohon shugaban ƙasa Goodluck Ebele Jonathan.

Kara karanta wannan

Da Dumi-Dumi: Shugaba Tinubu Ya Sake Sanya Labule Da Farfesa Okonjo-Iweala, Bayanai Sun Bayyana

Wanene Farfesa Ali Pate?

Kafin a naɗa shi ya zama minista, Pate ya yi murabus daga shugabancin kamfanin 'GAVI- Global Alliance for Vaccines and Immunization' inda ya yi nuni da cewa zai samu muƙami a gwamnatin Shugaba Tinubu.

A ranar Talata, 8 ga watan Agusta, Pate ya raka Ngozi Okonjo-Iweala, Darekta Janar ta ƙungiyar kasuwanci ta duniya domin ziyartar Shugaba Tinubu a fadar shugaban ƙasa.

A yayin da suke gaisawa, Shugaba Tinubu ya yaba wa Farfesan bisa kwazon da ya nuna lokacin da ake tantance shi domin zama minista a majalisar dattawa.

Pate, Okonjo-Iweala sun yi aiki a gwamnatin Jonathan

Shugaba Tinubu ya gaya masa cewa ya kalli yadda tantancewar ta sa ta kasance a talbijin.

"Na kalle ka a TV. Ka yi ƙwazo sosai." A cewarsa.

Idan ba a manta ba dai Pate da Okonjo-Iweala sun yi aiki a ƙarƙashin gwamnatin Goodluck Jonathan. Ngozi ta riƙe muƙamin ministan kuɗi da ministan kula da tattalin arziƙi.

Kara karanta wannan

"Shugaba Tinubu Ya Fi Sauran Shugabannin Najeriya", Cewar Jigon APC, Ya Bayyana Kwakkwaran Dalili

Okonjo-Iweala Ta Ziyarci Tinubu

A wani labarin kuma, Darekta Janar ta ƙungiyar kasuwanci ta duniya (WTO), Dr Ngozi Okonjo-Iweala ta ziyarci shugaban ƙasa Bola Ahmed Tinubu a Villa.

Okonjo-Iweala ta sanya labule da shugaban ƙasar ne domin tattauna muhimman batutuwa wajen kawo ci gaba ga al'ummar Najeriya a halin matsin da ake ciki a yanzu.

Asali: Legit.ng