Dan Najeriya Ya Yi Danasanin Mayar Da Motarsa Zuwa Mai Amfani Da Gas, Bidiyon Ya Yadu

• Bidiyon wani hatsari da ya afku a babban titi a Najeriya ya haddasa cece-kuce a soshiyal midiya
• A cewar @user145586464 a TikTok, hatsarin ya afku ne bayan wani mutum ya mayar da motarsa mai amfani da man fetur zuwa mai amfani da gas
• Da suke martani ga bidiyon wanda tuni ya yadu, mutane da dama sun bayyana hatsarurrukan da ke tattare da irin wannan sauyi

Dandalin soshiyal midiya ya dauki dumi bayan an wallafa bidiyon wata mota da ta dungi daukar zafi a babban titi a TikTok.

A cewar @user145586464 a TikTok, motar ta fara daukar zafi ba kakkautawa a kan babban titin bayan an mayar da ita zuwa mai amfani da iskar gas.

Yayin da ya wallafa bidiyon a shafinsa na TikTok, Michael Sunday, ya roki yan Najeriya da kada su kuskura su mayar da motocinsu masu amfani da man fetur zuwa masu amfani da iskar gas.

Kara karanta wannan

"Gara Fetur Sau Dubu": Wata Mata Ta Koka Bayan Gas 12kg Da Ta Zuba a Janaretonta Ya Kare Cikin Awanni 7

"Kada ku mayar da motarku zuwa mai amfani d gas da tukunyar gas a karkashi", ya rubuta.

Bidiyon wanda ya yadu ya nuno mutane suna watsa ruwa a karkashin motar a kokarinsu na kashe wutar da ta taso.

Martanin jama'a kan lamarin

Lamarin ya haifar da zazzafan muhawara a soshiyal midiya inda mutane da dama suka dasa ayar tambaya kan kariyar da ke tattare da mayar da motoci masu fetur zuwa masu amfani da gas da tukunyar gas.

Sai dai kuma, wasu masu martani sun bayyana cewa ba lallai ne mayar da motar zuwa mai amfani da gas bane ya haddasa tashin wutar.

@FIRSTBORN ya yi martani:

"Idan ba kwadayi ba mai zai sa ka mayar da corolla da bata shan mai zuwa gas."

@idrisathighpictur ya yi martani:

"Ka tabbata wannan mota mai amfani da gas ne? Saboda idan da mai amfani da gas ne da boot din motar ta tafi."

Kara karanta wannan

Dalilai 6 Da Suka Janyo Rage Yawan Amfani Da Man Fetur A Mulkin Tinubu

@user9333119079019 ya ce:

"Tambayar ita ce wacce irin tukunyar gas."

@amaravictory135 ya ce:

"Mutanen da suka kera mota suka ce da fetur zai yi aiki basu da hankali ko?"

@Ayoo ya ce:

"Na san hakan zai faru!"

Mata ta koka bayan mayar da janaretonta zuwa mai amfani da gas

A wani labarin, mun ji cewa wata mata ta bayyana halin da ta shiga bayan ta koma ga amfani da gas a madadin man fetur wajen gudanar da janaretonta.

Ta bayyana cewa ta siya iskar gas 12kg daga wani shago da ke kusa da ita sannan ta hada shi da janaretonta, tana ganin za ta samu rarar wasu yan kudade sannan ta mori wutarta ba tare da tangarda ba.

Asali: Legit.ng