Babban Limamin Masallacin Suleja Ya Riga Mu Gidan Gaskiya Bayan Ya Dawo Daga Aikin Hajji

• Allah ya yi wa babban limamin babban masallacin Suleja dake a jihar Neja rasuwa a ranar Asabar 22 ga watan Yulin 2023
• Sheikh Dahiru Shuaibu ya riga mu gidan gaskiya ne jim kaɗan bayan ya dawo daga aikin Hajji a ƙasa mai tsarki
• Marigayin ya rasu yana da shekara 76 a duniya inda ya bar matan aure huɗu, ƴaƴa 30 da jikoki da dama

Jihar Neja - Babban limamin babban masallacin Suleja a jihar Neja, Sheikh Dahiru Shuaibu, ya riga mu gidan gaskiya ranar Asabar, 22 ga watan Yuli ƴan sa'o'i kaɗan bayan ya dawo daga aikin Hajji a ƙasa mai tsarki.

Jaridar Daily Trust ta rahoto cewa wani daga cikin iyalan mamacin, Abduljalil Dahiru Shuaibu, ya bayyana cewa limamin wanda ya dawo Saudiyya ranar Asabar da misalin ƙarfe 9:00 na safe, ya rasu ne sakamakon bugun zuciya da misalin ƙarfe 11:00 na dare a gidansa.

Kara karanta wannan

Tsadar Rayuwa: Jami'ar Najeriya Za Ta Gwangwaje Ma'aikata Da Dalibanta Da Kayan Tallafi

Marigayin ya rasu jim kaɗan bayan ya dawo daga Saudiyya

Abduljalil ya bayyana cewa yana daga cikin ƴan tarbar marigayin bayan ya dawo a filin tashi da saukar jiragen sama na Abuja.

"Ina daga cikin iyalansa da suka je tarbarsa a filin tashi da saukar jirgin sama na Abuja ranar Asabar da safe bayan ya dawo. Amma da misalin ƙarfe 11:00 na dare sai aka kira ni a waya cewa ya rasu." A cewarsa.

Babban limamin wanda ya rasu yana da shekara 76 a duniya, tsohon Khadi ne a kotun ɗaukaka ƙara ta shari'ar musulunci a Minna jihar Neja.

Marigayin yana da matan aure guda huɗu da ƴaƴa 30 da jikoki da dama, rahoton Trustradio ya tabbatar.

Legit Hausa ta samu jin ta bakin wani mazaunin garin Suleja mai suna Malam Kabiru, wanda ya bayyana cewa an yi jana'izar marigayin ne da misalin ƙarfe 10:00 na safe, inda daga bisani aka binne shi a maƙabartar Chaza da ke a garin na Suleja.

Kara karanta wannan

Rikicin APC: Tsohon Gwamna Zai Maye Gurbin Omisore a Kujerar Sakataren Jam'iyyar Na Kasa? Bayanai Sun Fito

Babban Limamin Masallacin Juma'a a Kano Ya Rasu

A baya rahoto ya zo cewa babban masallacin Juma'a na Fagge ya riga mu gidan gaskiya yana da shekara 87 a duniya.

Sheikh Nasir Muhammad Nasir wanda aka fi sani da limamin waje ya koma ga mahaliccinsa ne bayan ya yi fama da jinyar rashin lafiya.

Asali: Legit.ng