Wani Jirgin Ruwa Dauke Da Mutum 100 Ya Kife a Wani Kauye a Jihar Kwara

• Rayukan mutane da dama sun salwanta bayan wani jirgin ruwa ɗauke da mutum sama da 100 ya kife a jihar Kwara
• Mutanen da hatsarin ya ritsa da su suna kan hanyar dawowa ne daga wajen bikin aure a wani ƙauyen da ke maƙwabtaka da su a jihar Niger
• Ƴan sanda sun tabbatar da aukuwar lamarin inda suka yi alƙwarin bayar da cikakkun bayanai daga baya kan hatsarin

Jihar Kwara - Wani jirgin ruwa mai ɗauke da fiye da mutum 100 ciki har da wani mahaifi da ƴaƴansa huɗu, ya kife a ranar Litinin a ƙauyen Egbu cikin ƙaramar hukumar Patigi ta jihar Kwara.

Jaridar Tribune ta kawo rahoto cewa an ciro gawarwakin mutane 50 da hatsarin ya ritsa da su, yayin da ake cigaba da jimami a ƙaramar hukumar.

Kara karanta wannan

Wani Matashi Da Ke Gab Da Yin Aure Ya Rasa Ransa Sakamakon Nutsewa A Ruwa A Enugu

An tattaro cewa jirgin ruwa ya ci karo da wata bishiya ne bayan iskar ruwa ta ci ƙarfinsa, wanda hakan ya sanya ya kife inda mutane da dama suka rasu sannan wasu suka samu raunika.

Mutanen da hatsarin ya ritsa da su suna dawowa ne daga wajen bikin aure a ƙauyen da ke maƙwabtaka da su na Egboti da ke cikin jihar Niger.

Majiyoyi daga ƙauyen sun bayyana cewa mutanen sun fara tafiyar ne daga ƙauyen Kpada a cikin jihar Kwara domin zuwa wajen bikin a ƙauyen Egboti na jihar Niger. 

A cewar majiyoyin, mutum 69 sun rasa rayukansu daga ƙauyen Egbu, mutum 36 daga ƙauyen Gakpan da mutum huɗu daga ƙauyen Kpada a cikin ƙaramar hukumar Patigi.

Ƴan sanda sun tabbatar da aukuwar lamarin

Da yake magana kan lamarin a ranar Talata, kakakin rundunar ƴan sandan jihar Kwara, Okasanmi Ajayi, ya bayyana cewa an tura DPO na Patigi zuwa yankin domin samo cikakkun bayanai dangane da hatsarin.

Kara karanta wannan

Gwamna Radda Ya Kwace Filayen da Gwamnatin Masari Ta Raba Wa Mutane a Katsina, Ya Faɗi Dalili

"Akwai ƙarancin bayanai kan jirgin ruwan da ya kife da mutum 100 a wani ƙauye cikin ƙaramar hukumar Patigi. Za mu bayar da cikakkun bayanai da zaran sun iso daga yankin." A cewarsa.

Mutane 40 Sun Nutse a Wani Hatsarin Jirgin Ruwa a Jihar Sokoto

A wani labarin na daban kuma, wani hatsarin jirgin ruwa ya ritsa da mutane da dama a jihar Sokoto da ke yankin Arewa maso Yamma na Najeriya.

Hatsarin jirgin ruwa ya ritsa ne da ƴan mata 40 lokacin da jirgin ya kife inda suka nutse gaba ɗaya bayan sun fita samu itace a cikin daji.

Asali: Legit.ng