Jam’iyyar APC Ta Fusata, Ta Kori Zababben Sanatanta a Jihar Taraba Bisa Zargin Cin Amanar Jam’iyya

• Rahoton da muke samu daga jihar Taraba na bayyana cewa, an kori zababben sanatan jihar Taraba bisa zarginsa da cin amanar APC
• Wannan na zuwa ne bayan kammala zabukan shugaban kasa da na gwamnoni a kasar nan, wadanda suka ja hankalin mutane
• A baya, an dakatar da wani sanata a jihar Gombe bisa zarginsa da cin amanar jam’iyyar a zaben da aka kammala

Takum, jihar Taraba - Rikicin cikin gida a jam’iyyar APC na ci gaba da habaka yayin da a karshen makon nan jam’iyyar ta kori zababben sanata David Jimkuta a karshen makon nan.

Ofishin jam’iyyar APC na karamar hukumar Takum ce ta dakatar da sabon sanatan bisa zarginsa da cin dunduniyarta.

Dakatar da sanatan na kunshe ne a cikin wata mudawwari mau dauke da sa hannun shugabanni 21 cikin 27 na kananan hukumomin jihar, rahoton jaridar Punch.

Kara karanta wannan

An samu matsala: Jam'iyyar APC ta kori wani fitaccen sanata a jihar Arewa

Dalilin da yasa aka dakatar da zababben sanatan

A cewar shugaban APC na yankin, Hon, Sirajo Sallau a cikin sanarwar mai dauke da kwanan watan 7 ga watan Afrilu, an dakatar da sanatan ne biyo bayan duba cikin tsanaki.

A cewarsa, kwamitin da aka hada don bincike kan ayyukan sanatan ne ya yanke hukuncin dakatar da sanatan a matsayin matakin farko na ladabtarwa, rahoton Sahara Reporters.

Martanin zababben sanatan bayan sanar da korarsa

A lokacin da aka tuntube shi, David Jimbuta ya ce:

“Wadanda suka sanya hannu kan takardar korar mara tushe ba mambobin jam’iyyar bane. Don haka, ban damu ba."

Rahotanni a baya sun bayyana cewa, akwai kitimurmura a game da kujera da tikitin sanatan Taraba ta Kudu a APC tsakanin zababben sanatan da kuma Usman Danjuma Shiddi.

Jimkuta ya maka Shiddi a kotu game da sakamakon zaben fidda gwanin da aka yi, inda daga baya ya yi nasara.

Kara karanta wannan

Yanzu-Yanzu: APC Ta Kori Sanata Da Aka Zaba A Karon Farko, Ta Bada Kwararan Dalilai

An dakatar da sanata a jihar Gombe

A wani labarin kuma, kunji yadda jam’iyyar APC ta dakatar da sanata mai ci saboda zarginsa da cin amanar jam’iyyar.

An dakatar da Amos ne a daidai lokacin da ake ci gaba da shirin rantsar da zababbun ‘yan siyasan da suka yi nasara a zaben bana.

Ya zuwa yanzu, jam’iyyar APC ta bayyana dalilin dakatar da sanatan tare da bayyana yadda ya gaza kare kansa a gaban wani kwamiti.

Asali: Legit.ng