Karancin Kudi Ya Sa Tsoho Ya Tafi Banki da Gado, Ya Nemi a Bashi Kudadensa

• Wani bidiyon da aka yada a kafar sada zumunta na wani tsoho da ya shiga bankin KeyStone da gado ya jika zukatan jama’a
• A bidiyon, an ga mutumin ya ajiye gado a kasa ya kwanta yayin da mutane ke masa kallon tausayi a farfajiyar bankin
• Jama’ar kafar sada zumunta sun kadu da ganin yadda mutumin ke cikin tashin hankali na rashin lafiya, sun nemi a biya masa bukatarsa

Wani dan Najeriya mara lafiya ya shiga tashin hankali, ya dauki mataki don ganin bankin KeyStone sun dauki kudinsa sun bashi.

A wani bidiyo mai taba zuciya da aka yada, dattijon ya tafi banki da gadonsa, inda ya zauna zaman jira dirsham a harabar bankin.

Ya roki ma’aikatan bankin da su taimake shi su ba shi tsabar kudi domin ya biya kudaden jinya da yake yi a asibiti.

Kara karanta wannan

Karancin Naira: Aiki Ya Kwabe Maku, Ku Je Ku Koyi Dambe, Shehu Sani Ga Ma'aikatan Banki

A bidiyon da aka yada a TikTok an rubuta:

"Ya kamata bankin Keystone ya sake masa kudinsa. Bai shi da lafiya kuma yana bukatar kudi don kula da kansa.”

Martanin jama’a a kafar sada zumunta

Ga kadan daga masu nuna jimami da tausaya dattijon:

@arnoldatkinson85:

"Na gaza gane wannan nahiya ta Afrika mutum ya zo ciki da kansa ba zai cire kudin da ya sha wahala ya samu ba.”

@jerrygodspower:

"Haba don Allah babu bukatar kawo wannan mutumin nan, cikin sauki ku sauke manhajar Keystone sai ku yiwa asibitin da yake jinya tiransifa.”

@williamkelvin680:

"Na gaji da wannan kasar, ka samo kudi ka karbe su ya zama yaki gwamnati sai mugunta sun manta za su hadu da Allah.”

@realgoa:

"Wannan wane irin matsala ne. Mutanen da ke kusa dashi ya kamata su taimake shi, a ina wannan tsohon yake?”

Kara karanta wannan

2023: APC na kitsa yadda za su sa kiristoci su tsane ni, Atiku ya tono sirrin 'yan APC

@imani_quest:

"Idan aka ce musu su saka mutumin da ya dace a aiki, sai suce maka ba dan uwansu bane. Yanzu kowa zai shiga taitayinsa.”

Akwai kudi a CBN, bankuna sun ki zuwa dauka, cewar babban banki

A wani labarin kuma, bankunan Najeriya ne masu laifi idan ana magana kan yadda karancin kudi yake kara ta’azzara a kasar nan.

Wannan na fitowa ne daga babban banki, inda yace bankunan sun ki zuwa daukar sabbin kudaden da aka buga kwanan nan.

A bayyane yake, bankuna a Najeriya na ba ‘yan kasar wahala wajen samun wadatattun sabbin kudade, tsoffin ma sun kare a hannun jama’a.

Asali: Legit.ng