Yadda Shugaba Buhari Ya Yi Kwanaki fiye da 200 a Asibiti, Ya Ziyarci Kasashe 40

• Babu mamaki Mai girma Muhammadu Buhari yana cikin shugabannin da suka fi yawo a Duniya
• Shugaban Najeriyan ya ziyarci kasashe sama da 40 daga lokacin da ya hau mulki a 2015 zuwa yau
• Buhari ya kuma shafe kwana da kwanaki a kasar asibitin Landan domin ya kula da lafiyar jikinsa

Abuja - Daga lokacin da Muhammadu Buhari ya karbi ragamar shugabancin Najeriya zuwa yau, ya shafe kwanaki akalla 225 bai ofis, yana asibiti.

Wani dogon rahoto da aka samu a jaridar Punch ya nuna a Fubrairun 2016 ne Mai girma Muhammadu Buhari ya tafi ganin Likitansa a karon farko.

Ziyarar farko da ya yi zuwa asibiti a Landan ya dauki kwanaki shida ne kurum. Bayan watanni hudu sai ya sake kwana goma ana duba kunnensa.

A ranar 19 ga watan Junairun 2017, shugaban kasar ya sanar da majalisa zai je Landan domin ya yi kwanaki 10, bai iya dawowa ba sai a Maris.

Kara karanta wannan

Yadda Janar Obasanjo Ya Tsiyace Shekaru 3 Bayan Ya Sauka daga Karagar Mulki

An yi kwana 100 Osinbajo yana rike da kasa

Jim kadan bayan dawowarsa Najeriya, Buhari ya sake tafiya Landan inda ya yi tafiyar da ta fi kowace tsawo, a lokacin ya shafe kwanaki 104 a Ingila.

Binciken da jaridar tayi, ya nuna shugaban kasar bai sake zuwa asibiti ba sai a watan Mayun 2018, a lokacin kwanaki hudu kurum ya dauka ana duba shi.

A watan Maris na shekarar 2021, kamar yadda ya saba, Buhari ya je Landan domin a duba lafiyarsa, bai wuce kwanaki 15 a can ba, sai ga shi ya dawo gida.

Bayan shekara daya, a watan Maris na shekarar bana, jirgin shugaban na Najeriya ya isa Landan, a nan ma Muhammadu Buhari ya ga likitoci, ya dawo.

Tafiyar karshe da shugaban kasar ya yi zuwa asibiti ita ce a watan Oktoban bana, an bada sanarwar cewa Buhari ba zai wuce kwanaki 14 a kasar Turan ba.

Kara karanta wannan

Abubuwan da Atiku, Obi, Kwankwaso Suka Fada a Taron 'Yan Takaran 2023

Kamar yadda Femi Adesina ya yi alkawari, a ranar 13 ga watan Nuwamba, jirginsa ya iso Abuja.

Buhari ya je kasashe 40

Rahoton ya nuna a cikin ziyara da tafiye-tafiye da Muhammadu Buhari ya yi a tsawon shekaru bakwai da rabi, ya je kasashe akalla 40 da ke Duniya.

Shi ma mataimakinsa watau Farfesa Yemi Osinbajo ba a bar sa a baya ba, ya ziyarci kasashe da-dama. Daga ciki har da irinsu Vietnam da kuma Kanada.

APC za ta zarce a mulki?

Bayan Bola Tinubu ya je Chatham House, an ji labari Raji Babatunde Fashola ya fadi yadda za suyi wajen ganin Bola Tinubu ya karbi mulkin kasa a 2023.

Ministan na ayyuka da gidaje ya kaddamar da kwamitinsa da zai taimaka wajen shiga ko ina da nufin kawowa Jam’iyyar APC nasara a zabe mai zuwa.

Asali: Legit.ng