Gwamna Zulum Ya Ba da Umarnin a Fara Koyawa Almajirai Sana’o’in Hannu a Borno

• Gwamnan jihar Borno ya ba da umarnin a gwama karatun sana'a da na allo a Tsangayoyin jiharsa dake Arewa maso Gabas
• Rahoton da aka ba gwamnan ya nuna adadin dalibai, malamai da makarantun allo da Islamiyya da ake dasu a jihar
• Jihar Borno na daya daga cikin jihohin da suka sha fama da matsalar Boko Haram, har yanzu ana ci gaba da tasirantuwa da barnar 'yan ta'adda

Jihar Borno - Gwamna Babagana Umara Zulum na jihar Borno ya ba da umarnin a gwama fannin koyarda sana'o'i da Tsangayoyin almajirai 2,775 da makarantun Islamiyya 451 a fadin jihara.

Gwamnan ya ba da wannan umarnin ne a gidan gwamnatin jihar yayin da yake karbar bayanai game da tantance Tsangayoyi da makarantun Islamiyya a karkashin majalisar gwamnati ta makaratun Islamiyya da Tsangayu ta jihar.

Kara karanta wannan

Kamfen 2023: Ba a yi nisa ba, INEC ta fara kuka da yadda jam'iyyun siyasa ke kare jini biri jini

Wannan batu na Zulum na kunshe ne a cikin wata sanarwa da gwamnan ya wallafa a shafinsa na Facebook a ranar Talata 18 ga watan Oktoba.

Manufar Zulum na kawo shirin sana'a a Tsangaya

Gwamnan ya bayyana cewa, shirinsa na gwama sana'o'i a makarantun allo da na da Boko wani yunkuri ne na ba daliban Tsangaya damar shiga jami'a da cibiyoyin ilimin gaba da sakandare.

Ya kuma bayyana cewa, koyar da sana'o'in zai rage yawan adadin yaran da ba sa zuwa makaranta a fadin jihar.

Hakazalika, hakan zai rage yawon bara na almajirai dake karade tituna da lunguna har ma da sako a fadin jiharsa.

Da yake magana, shugaban majalisar gwamnati ta makaratun Islamiyya da Tsangayu ta jihar, Khalifa Ahmad Abulfatahi, ya gabatar da sakamakon bincike da tattara Tsangaya a zagayen kananan hukumomi 27 na Borno.

Kara karanta wannan

Tashin hankali: Gwamnatin Buhari ta gani makarantun bogi 349 a jihar Arewa dake cinye kudin ciyar da dalibai

Sai dai, ya ce, binciken majalisar bai ga nasarar kaiwa ga kananan hukumomin Kala-Balge, Guzamala da Abadam na jihar.

Ya bayyana cewa, majalisar na da makarantun Tsangaya 2,775 tare da malamai 12,309 da kuma dalibai 224,068.

A cewarsa, akwai dalibai 128,789 dake karatun jeka-ka-dawo da kuma 97,279 dake karatu a makarantun kwana.

Majalisar ta kuma gani makarantun Islamiyya 451 dake aiki a fadin jihar.

Asali: Legit.ng