Babbar Magana: Netanyahu Ya Shirya Kawo Matsala ga Trump kan Yaki da Iran

• Shugaban kasar Amurka, Donald Trump, ya fara yunkurin ganin an kawo karshen yakin da kasarsa ke yi kan Iran tare da Isra'ila
• Firaministan Isra'ila, Benjamin Netanyahu, ya fara nuna alamun rashin gamsuwa ga shirin Trump na kawo karshen yakin
• Netanyahu da makusantansa na da abubuwa uku da suke son cimmawa a yakin, wanda idan aka tsayar da shi a yanzu hakarsu ba za ta cimma ruwa ba

​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Birnin Tel-Aviv, Isra'ila - Firaministan Isra'ila, Benjamin Netanyahu, ya ba wa kwamandojinsa umarni kan yakin da ake yi da Iran.

Netanyahu ya ba kwamandojin Isra’ila wa’adin sa’o’i 48 don lalata masana’antun makaman Iran daga maboyarsa ta ƙarƙashin ƙasa da ke Tel Aviv, bayan ya duba shirin zaman lafiya da Donald Trump ya miƙa.

Jaridar Daily Mail ta kawo rahoton umarnin da Netanyahu ya ba da a ranar Laraba, 25 ga watan Maris 2026.

Kara karanta wannan

Yaƙi da Iran ya raba kan Amurkawa, ana ganin Trump ya fara wuce gona da iri

Netanyahu ya ba kwamandoji umarni

Netanyahu ya umarci rundunar tsaron Isra’ila (IDF) da ta kai hari kan duk wasu muhimman wurare na Iran da za ta iya, a daidai lokacin da Amurka ta miƙa shirin zaman lafiya mai bukatu 15 a ranar Talata.

Firaministan Isra’ila da manyan masu ba shi shawara kan harkokin soja sun firgita cewa shirin na Amurka bai tsaurara ba wajen dakile ƙarfin sojin Tehran, duk da tsauraran takunkuman da ya ɗora kan tarin makamai masu linzamin Iran da shirin nukiliyarta.

Netanyahu ya damu kan shirin Trump

Majiyoyi sun ce wa’adin na ranar Alhamis da Netanyahu ya bayar yana nuna tsananin damuwa a cikin gwamnatin Isra’ila cewa Trump na iya cimma yarjejeniya da Tehran a kowane lokaci.

Jami’an Isra’ila da suka halarci taron na sirri a ƙarƙashin ƙasa sun bayyana yanayin wurin a matsayin mai "cike da damuwa"

Jami’an gwamnatin Iran sun yi watsi da bukatun ta kafafen yaɗa labaran gwamnati a ranar Laraba.

Kara karanta wannan

Pakistan za ta shiga tsakani a yakin Amurka da Isra'ila ke gwabzawa da Iran

Abubuwan da Netanyahu yake so kan Iran

Na-kusa da Netanyahu sun ƙuduri aniyar cimma manyan manufofin yaƙi guda uku:

• Kawar da tarin makamai masu linzami na Iran
• Tabbatar da cewa Iran ba za ta iya kera makamin nukiliya ba.
• Samar da yanayi a cikin Iran da zai ba farar hula damar kifar da gwamnatin Musulunci.

"Idan ba ku cimma waɗannan manufofin guda uku ba, ba za ku iya kawo ƙarshen yaƙin b​a," in ji Boaz Bismuth, ɗan jam’iyyar Netanyahu.

Wa’adin na ranar Alhamis da Netanyahu ya bayar yana nuna tsananin damuwa a cikin gwamnatin Isra’ila cewa Trump na iya cimma yarjejeniya da Tehran a kowane lokaci.

Firaministan Spain ya caccaki Netanyahu

A wani labarin kuma, kun ji cewa Firaministan Spain, Pedro Sanchez, ya caccaki Benjamin Netanyahu kan yakin da yake yi a Lebanon.

Pedro Sanchez ya bayyana cewa Firaministan na Isra'ila yana son ya yi gagarumar barna a Lebanon kamar yadda ya yi a Gaza.

Hakazalika, Pedro Sanchez ya kuma bayyana cewa gwamnatinsa tana adawa da yaƙin Amurka da Isra'ila a kan Iran.

Asali: Legit.ng