Babu Sassauci: Makaman Iran Sun Sauka a Isra'ila, an Ji Barnar da Suka Yi

• Iran ta harba makamai masu linzami zuwa kasar Isra'ila yayin da ake ci gaba da gwabza fada a yankin Gabas ta Tsakiya
• Makaman masu linzami sun sauka a wasu wurare na kasar Isra'ila inda suka yi barna kamar yadda hukumomi suka bayyana
• Wasu baraguzan makaman kuma da aka kakkabo sun yi barna yayin da hukumomi suka gargadi mutane kada su taba su

​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

Birnin Tel-Aviv - Makamai masu linzami na Iran sun yi barna a wurare da dama na kasar Isra'ila.

Akalla wurare 10 a tsakiyar Isra'ila ne makaman ko kuma baraguzan makaman da aka kakkabo suka afka wa ranar Litinin, 16 ga watan Maris 2026, kamar yadda hukumomi suka sanar.

Jaridar Jerusalem Post ta ce hukumar agajin gaggawa ta MDA ta dauki wata mace guda zuwa asibiti wadda ta sami raunuka marasa tsanani.

Kara karanta wannan

Iran ta harba babban hatsabibin makamin Sijjil zuwa Isra'ila a karon farko

Makaman Iran sun sauka a Isra'ila

Tashar Aljazeera ta bayar da rahoton faɗawar makamai a wurare da dama a tsakiyar Isra'ila ranar Litinin biyo bayan luguden makamai masu linzami da Iran ta harba.

A cewar hukumar kashe gobara da ceto ta Isra'ila, wurare 10 ne a faɗin ƙasar suka samu lalacewa sakamakon baraguzan makaman da aka kakkabo.

Guda bakwai daga cikin wuraren suna a Rishon Lezion, sannan wasu ƙarin wuraren a kan babban titin Highway 431, da Lod, da kuma Shoham.

Ƙungiyoyin ceto sun kai ɗauki zuwa wurare daban-daban a Shoham da Rishon Lezion, inda suka gudanar da bincike a gine-gine da yankunan da ke kewaye.

A wani rukunin harin na baya, baraguzan makamai sun faɗo a yankin da ke kusa da Jerusalem, da kuma Beit Shemesh da ke yammacin babban birnin da misalin ƙarfe 3:00 na rana.

Wace irin barnar suka yi?

Hukumar MDA ta lura cewa wani mutum a Jerusalem ya taɓa baraguzan makamin da ya faɗo a birnin, wanda hakan ya janyo masa ƙuna maras tsanani a hannunsa.

Kara karanta wannan

Isra'ila ta fadi matsalar da ta ke fuskanta yayin yaki da Iran

Jami'an lafiya sun ba shi kulawar farko sannan suka mayar da shi zuwa cibiyar kiwon lafiya ta jami'ar Hadassah da ke kan dutsen Scopus a Jerusalem.

Aƙalla rufin wani gini ɗaya a gabashin Jerusalem ya nuna alamun samun babban lahani biyo bayan faɗuwar baraguzan makaman a yammacin ranar Litinin.

Rundunar 'yan sandan Isra'ila ta bayyana cewa ta tura ƙungiyoyin kwashe baraguzan makaman da suka faɗo, sannan ta yi kira ga jama'a da kada su kusanci wuraren da makaman suka faɗa kuma kada su taɓa kowane irin gutsure ko sassan makaman da aka kakkabo.

Halin da Netanyahu yake ciki

A wani labarin kuma, kun ji cewa bayanai sun fito kan jita-jitar da ake yadawa kan mutuwar Firaministan Isra'ila, Benjamin Netanyahu.

Benjamin Netanyahu, ya wallafa wani bidiyo yana shan shayi tare da tattaunawa da hadiminsa, bayan jita-jitar da kafafen yada labarai suka yada cewa ya mutu ko ya ji rauni.

Firaministan na Isra'ila ya fitar da bidiyon ne domin yin fatali da jita-jitar da ke cewa ya mutu sakamakon hare-haren Iran.

Asali: Legit.ng