Juyin Mulki: Manyan Abubuwa 5 Da Suka Faru Kan Rikincin Jamhuriyar Nijar
Tun bayan sanar da hamɓarar da tsohon shugaban Nijar Mohamed Bazoum da shugaban sojojin juyin mulkin Nijar Abdourahmane Tchiani ya jagoranta, abubuwa da dama sun wakana a ciki da wajen ƙasar.
DUBA NAN: Bibiyi shafin Legit.ng Hausa a kafar TikTok. Kada ka bari bidiyo mai daukar hankali ya wuce ka!
Ƙungiyar ECOWAS ta bai wa sojojin juyin mulkin umarnin su mayarwa da tsohon shugaban ƙasar kujerarsa ko su fuskanci mummunan mataki.
An samu masu shiga tsakanin da dama da ke ƙorarin ganin an sasanta rikicin cikin lalama, wanda a cikin hakan ne Legit.ng ta tattaro wasu daga cikin manyan abubuwa biyar da suka wakana a makon da muke ciki.
Asali: Facebook
Ganawa da malaman addinin Musulunci
A ranar Alhamis, 24 ga watan Agusta ne dai Shugaba Bola Tinubu ya gana da tawagar malaman addinin Musulunci a fadarsa da ke birnin tarayyar Najeriya.
Shin kana da labarin da ka/ki ke son an wallafa ma ka/ki? Ka tuntubemu a info@corp.legit.ng!
An bayyana cewa malaman sun gana da Tinubu ne domin ba shi bayani kan ziyarar da suka kai jamhuriyar Nijar kamar yadda Vanguard ta wallafa.
AU ta dakatar da Nijar daga cikin mambobinta
A cikin makon nan ne Kungiyar Tarayyar Afrika (AU), ta sanar da dakatar da jamhuriyar Nijar daga cikin mambobinta.
Ƙungiyar ta AU ta ce ba za ta mayar da Nijar cikin mambobinta ba har sai lokacin da ƙasar ta koma turbar dimokuraɗiyya kamar yadda Channels TV ta wallafa.
Maganar sojoji kan mayar da Bazoum kan mulki
A cikin makon nan ne dai jagoran masu shiga tsakanin na kungiyar ECOWAS, Abdulsalami Abubakar ya bayyana cewa sojojin Nijar sun ce ba za su mayar da Bazoum kan kujerarsa ba.
Abdulsalami ya ce sojojin sun faɗa ma sa cewa a shirye suke su yi kowace irin tattaunawa da ECOWAS, amma banda batun mayar mulki hannun farar hula.
Kulla ƙawancen soji tsakanin Nijar, Mali da Burkina Faso
Shugabannin mulkin sojin jamhuriyar Nijar sun sanar da ƙulla ƙawance na soji tsakaninsu da ƙasasehen Mali da Burkina Faso ranar Alhamis, 24 ga watan Agusta a Yamai babban birnin ƙasar.
Ƙawance zai bai wa duka ƙasashen uku damar taimakawa junansu a duk lokacin da aka kai wa ɗaya daga cikinsu hari da kuma sauran matsaloli na tsaro.
An fama da ƙarancin dabbobi saboda rufe iyakoki
Wani rahoto da Legit.ng ta wallafa a baya ya nuna yadda al'umma musamman ma waɗanda ke kasuwancinsu a kan iyakokin Najeriya da Nijar ke ci gaba da kokawa.
'Yan kasuwar shanu da ke kan iyakokin sun bayyana yadda adadin shanun da suke sayarwa da waɗanda suke yankawa ya ragu kamar yadda Daily Trust ta ruwaito.
Egypt da Algeria sun ki amincewa da amfani da ƙarfin soji kan Nijar
Legit.ng a baya ta yi rahoto kan ƙin amincewa da ƙasashen Egypt da Algeria suka yi kan amfani da matakin soji wajen dawo da dimokuraɗiyya a jamhuriyar Nijar.
A yayin da kungiyar ECOWAS ke nuna alamu kan yiwuwar amfani da mataki na soji wajen shawo kan rikicin na Nijar, ƙasashen biyu sun ce zama kan teburin sulhu ya fi dacewa a yi.
Asali: Legit.ng
