Ta Fasu: ADC Ta Fallasa Makarkashiyar da INEC Ke Shirya Mata kan Zaben 2027

• ADC mai adawa a Najeriya ta nuna damuwa kan abubuwan da hukumar zabe mai zaman kanta ta kasa (INEC) take yi mata
• Jam'iyyar ADC ta yi zargin cewa hukumar zabe ta INEC na shirin kawo mata cikas a zaben shekarar 2027 da ake tunkara
• Kakakin jam'iyyar ADC ta nuna cewa INEC ta dana mata tarkon da zai sanya ta kasa gabatar da 'yan takara a zaben 2027

​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Jam’iyyar ADC mai adawa a Najeriya ta yi zargi kan hukumar zaɓe kai zaman kanta ta kasa (INEC).

ADC ta zargi hukumar INEC da kitsa abin da ta kira "tarkon a harkoki da gangan" da nufin hana jam’iyyar gabatar da ’yan takara a babban zaɓen 2027.

Hakan na kunshe ne a cikin wata sanarwa mai zafi da sakataren yaɗa labarai na kasa na ADC, Mallam Bolaji Abdullahi ya fitar a shafinsa na X a ranar Litinin, 6 ga watan Afirilun 2025.

Kara karanta wannan

Matakin INEC game da shugabannin ADC ya tafi gaban Trump da majalisar Amurka

Me jam'iyyar ADC ta ce kan hukumar INEC?

Jam’iyyar ADC ta yi zargin cewa matakan baya-bayan nan na INEC na iya fitar da ita daga tsarin zaɓen 2027 baki ɗaya.

Babban abin da ke haddasa takaddamar shi ne matsayar INEC na cewa ba za ta ƙara karɓar kowace irin wasiƙa daga ADC ba har sai an yanke hukunci kan wata ƙara da ke gaban babbar kotun tarayya.

A cewar ADC, dokar zaɓe ta 2026 ta fayyace lokutan ayyuka ga jam’iyyun siyasa, ciki har da sharuɗɗan ba da sanarwar kwanaki 21 ga muhimman ayyuka da kuma ƙayyadaddun kwanaki na miƙa takardu.

Jam’iyyar ta lura cewa INEC ta riga ta tsayar da ranar 10 ga Mayu a matsayin ranar ƙarshe ta miƙa waɗannan takardu.

ADC: INEC na son hana ta shiga zaben 2027

ADC ta kafa hujjar cewa ta hanyar ƙin karɓar wasiƙunsu a wannan lokacin, INEC tana toshe su ne daga bin doka yadda ya kamata.

Kara karanta wannan

Ana maganar 2027, INEC ta kawo sabon tsari da dole mai zabe ya bi

“A taƙaice, INEC tana barazanar cewa sai dai idan kotuna sun yanke hukunci kan batun shugabancin ADC kafin 10 ga Mayu, idan ba haka ba za ta hana jam’iyyar samar da ’yan takara."

- Bolaji Abdullahi

Jam’iyyar ta jaddada cewa wannan yanayi ya jefa ta cikin "matsayi mai wuyar gaske," wanda hakan ke ƙirƙirar abin da ta kira "rashin bin doka na ƙarya" wanda daga baya za a yi amfani da shi azaman dalilin hana su shiga zaɓe.

Yayin da take nuna hujjoji na takardu, ADC ta ce INEC ta riga ta amince da tsarin shugabancinta na yanzu a baya.

Ta bayyana cewa hukumar ta karɓi sanarwar taron NEC na ranar 29 ga Yuli, 2025, kuma ta tura jami'ai don sa ido kan taron, sannan ta sabunta bayanan ta inda suka nuna bayyana Sanata David Mark a matsayin shugaba da Ogbeni Rauf Aregbesola a matsayin sakatare.

ADC ta yi zargi kan hukumar INEC

Jam’iyyar ADC ta zargi hukumar zaɓen da ɗaukar matsayi mai cin karo da juna ta hanyar dakatar da hulɗa da ita, yayin da a lokaci guda take tilasta bin ƙayyadaddun kwanakin gudanar da ayyukan zaɓe.

Kara karanta wannan

Amsar APC ga gwamnoni, yan majalisa da ke neman tikitin takara kai tsaye a zabe 2027

ADC ta yi gargaɗin cewa wannan ci gaba na iya gurgunta ƙa’idodin dimokuraɗiyya, tare da kiran INEC da ta gaggauta janye matsayarta.

An bukaci shugaban INEC ya yi murabus

A wani labarin kuma, kun ji cewa jam'iyyar ADC ta bukaci Shugaban hukumar INEC, Farfesa Joash Ojo Amupitan, ya yi murabus.

Shugaban ADC na kasa, Sanata David Mark, ya bukaci Amupitan ya yi murabus kan matakin da INEC ta dauka na daina amincewa da shugabannin jam'iyyar.

David Mark ya bayyana cewa kiran ya zama dole ne saboda “shugaban hukumar da kwamishinoninsa sun nuna goyon baya ga jam’iyyar APC mai mulki.

Asali: Legit.ng