Babban Jigon PDP kuma Fitaccen Ɗan Kasuwa da Magoya Baya 6,000 Sun Koma APC

• Jam'iyyar APC ta ƙara samun ƙaruwa a jihar Abia da ke Kudu maso Gabashin Najeriya bayan sauya sheƙar tsohon shugaban PDP
• Wani ƙusa a PDP kuma fitaccen ɗan kasuwa a Abia, Cif Kelvin Jumbo Onumah ya jagoranci dubannin magoya bayansa, sun koma jam'iyyar APC
• Shugaban APC na Abia, Dr. Kingsley Ononogbu ya karɓi masu sauya sheƙar hannu bibbiyu, ya ce da wannan jam'iyyar ta shirya tsaf don karɓe mulki a 2027

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Jihar Abia - Babban jigo a jam'iyyar PDP ta jihar Abia kuma fitaccen ɗan kasuwa a fannin man fetur da iskar gas, Cif Kelvin Jumbo Onumah, ya sauya sheƙa zuwa APC.

Fitaccen ɗan siyasar a Kudu maso Gabashin Najeriya ya fice daga PDP zuwa APC ne tare da magoya bayansa 6,000.

Kara karanta wannan

Tsohon shugaban AMAC ya sauya sheƙa zuwa APC, ya shiga takarar gwamna

Jaridar Leadership ta tattaro cewa an tarbe shi a hukumance a ranar Juma'a, 10 ga Janairu, 2025, a filin wasa na Abiriba da ke karamar hukumar Ohafia ta jihar Abia

Shugaban APC reshen jihar Abia, Dr. Kingsley Ononogbu, ya mika masa tutar jam'iyyar a hukumance a wurin taron.

Wannan na zuwa ne bayan tsohon shugaban PDP na Abia, Sanata Emma Nwaka da tsohon kakakin majalisar dokokin jihar, Chinedum Orji sun koma APC.

Jiga-jigan sun koma jam'iyyar APC ne tare da hadiman tsohon gwamnan Abia, Okezie Ikpeazu.

APC ta shirya karɓe mulkin jihar Abia

A jawabinsa, Dr. Ononogbu ya bayyana cewa jam'iyyar APC ta shirya tsaf don karɓar mulkin jihar Abia a zaɓen 2027.

Ya ce APC za ta yi amfani da nasarorin da Sanata Orji Uzor Kalu, mataimakin kakakin majalisar wakilai, Benjamin Kalu, da ƙaramar ministar ƙwadago, Nkeiruka Onyejeocha, suka cimma a yaƙin neman zaɓe.

Dalilin jigon PDP na komawa APC

Kara karanta wannan

Ganduje da APC sun yi babban kamu, tsohon shugaban PDP ya koma jam'iyya

Chief Onumah ya bayyana cewa ya yanke shawarar shiga jam'iyyar APC ne domin kawo ci gaba ga mutanensa na mazabar Arochukwu/Ohafia da kuma yankin Abia ta Arewa baki ɗaya.

Ɗan siyasar ya ƙara da cewa ya shiga APC ne domin ba da tashi gudummuwar wajen kawo ci gaba ga al'umma a Abia da ƙasa baki ɗaya.

Ana ganin dai shekar da manyan ƴan siyasa ke yi zuwa APC a jihar Abia na ƙarawa jam'iyyar ƙarfi da tasiri tun bayan zaɓen 2023.

Jam'iyyar APC mai adawa a jihar Abia ta fara shirye-shiryen tunkarar babban zaɓen 2027 mai wanda wanda shugabanninta ke nanata cewa za su karɓe mulki daga LP.

Tsohon shugaban AMAC ya koma APC

A wani rahoton, kun ji cewa tsohon shugaban ƙaramar hukumar kwaryar birnin Abuja (AMAC), Prince Nicholas Ukachukwu ya sauya sheka zuwa APC.

Ya kuma bayyana burinsa na tsayawa takarar gwamna a inuwar jam'iyyar APC a zaɓen gwamnan Anambra da za a yi a watan Nuwamba, 2025.

Asali: Legit.ng