Gwamnonin Arewa Za Su yi Taron Dangi domin Hana Bukatar Tinubu

• Gwamnan jihar Bauchi, Sanata Bala Abdulkadir Muhammad ya yi tsokaci kan kudirin harajin gwamnatin Bola Ahmed Tinubu
• Sanata Bala Muhammad ya ce har yanzu gwamnonin Arewa suna kan bakarsu ta yaki da bukatar Tinubu na sauya fasalin haraji
• Gwamnan ya tabbatar da cewa idan shugaban kasa ya ki janye buƙatar, za su yi taron dangi wajen tabbatar da rusa ta a majalisa

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Jihar Bauchi - Gwamnan jihar Bauchi, Bala Abdulkadir Muhammad ya bukaci shugaba Bola Ahmed Tinubu ya janye maganar sauya tsarin haraji.

Sanata Bala Muhammad ya ce sauya tsarin harajin zai kara durƙusa Arewacin Najeriya kuma saboda haka ne suke yaki da lamarin.

Kara karanta wannan

Tinubu ya shirya gwangwaje ƙananan yan kasuwa, ya fadi ka'idojin cin gajiyar N75bn

Jaridar Daily Trust ta wallafa cewa gwamnan ya ce za su dauki matakin da zai hana kudirin samun karɓuwa a majalisa.

An bukaci Bola Tinubu ya janye kudirin haraji

Gwamnan jihar Bauchi ya kara kira ga shugaban kasa Bola Tinubu kan janye kudirin haraji da ya gabatar a majalisa.

Sanata Bala Muhammad ya ce akwai buƙatar sake nazari da gyare gyare a kan kudirin kafin amincewa da shi.

Dalilin kiyayya da kudirin haraji a Arewa

Sanata Bala Muhammad ya ce gwamnonin Arewa suna kin kudirin ne saboda zai kara durƙusa Arewacin Najeriya.

Gwamnan ya ce daga cikin abin da suke ki shi ne kudirin zai ba kamfanoni damar biyan haraji a jihohin Kudu duk da cewa a Arewa ake amfani da kayan da suka sarrafa.

Ya kara da cewa ya kamata a ce dukkan kayan da ake amfani da su a Arewa ana karbar harajinsa a yankin ba wai a wasu jihohin Kudu da ake sarrafa su ba.

Kara karanta wannan

Gwamna zai saye abincin N3bn ya sayarwa talakawa da sauki

Gwamnoni za su yi wa Tinubu taron dangi

Gwamnan Bauchi ya kara da cewa idan Bola Tinubu ya dage kan kudirin, za su yi taron dangi wajen hada kan yan majalisa su yaƙe shi.

Bala Muhammad ya bayyana cewa ba za su zuba ido suna kallo har a kawo wata doka da za ta kara nakasa Arewa ba.

Ndume zai yaki kudirin haraji a majalisa

A wani rahoton, kun ji cewa Sanata Ali Ndume ya ce zai tabbatar da ya yaki kudirin sauya hanyar tattara haraji a Najeriya.

Sanata Ali Ndume ya ce zai hada kan yan majalisa wajen yaki da bukatar shugaban kasa Bola Tinubu a kan sauya fasalin haraji.

Muhammad Malumfashi, babban edita a sashen Hausa na Legit ya duba labarin.

Asali: Legit.ng