Gwamna Ya Kara Yi Wa PDP Illa, Tsohon Ɗan Majalisa da Wasu Jiga Jigai Sun Koma APC
- Gwamnan jihar Ondo, Lucky Aiyedatiwa ya karɓi tsohon ɗan majalisa da wasu kusoshin PDP da suka sauya sheƙa zuwa APC
- Jiga-jigan sun shiga APC ne a wurin yakin neman zaɓen Gwamna Aiyedatiwa a ƙaramar hukumar Akoko ta Arewa maso Gabas
- A ranar 16 ga watan Nuwamban da muke ciki INEC ta tsara gudanar da zaɓen gwamna a Ondo, Aiyedatiwa zai nemi tazarce
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Jihar Ondo - Wasu manyan jiga-jigan jam'iyyar PDP a jihar Ondo sun sauya sheƙa zuwa APC mai mulki ana shirye-shiryen zaben gwamna a watan Nuwamba.
Tsohon ɗan majalisa, wanda ya wakilci mazaɓar Akoko ta Arewa maso Gabas/Arewa maso Yamma a majalisar wakilai, Stephen Olemija na cikin masu sauya sheƙar.
Asali: Facebook
Hakan na kunshe a wata sanarwa da gwamnan Ondo, Lucky Aiyedatiwa ya wallafa a shafinsa na Facebook.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Manyan jiga-jigan PDP sun koma APC
Tsohon ɗan majalisar, Hon. Olemija ya sauya sheka ne tare da wasu manyan ƙusoshin PDP da tsofaffin shugabanni a mazaɓar.
Daga cikin waɗanda suka bi sahun tsohon ɗan majalisar har da Lekan Bada, tsohon ciyaman na Akoko ta Arewa maso Yamma da wani jigo, Momoh Mufu.
Olemija ya ce zai yi wuya jam’iyyar PDP ta samu goyon bayan jama’a a zaben gwamnan da za a yi ranar 16 ga watan Nuwamba, 2024.
Gwamna Aiyedatiwa ya karɓi mutane a APC
Gwamna Lucky Aiyedatiwa ya karbi jiga-jigan masu sauya sheƙar zuwa APC da jirgin yakin neman zaɓensa ya dura ƙaramar hukumar Akoko ta Arewa maso Gabas a ƙarshen mako.
Da yake karɓar masu sauya sheƙar, Gwamna Aiyedatiwa wanda shi ne ɗan takara a inuwar APC, ya ce gwamnatinsa za ta jawo kowa a jiki idan ta samu nasara.
Gwamnan ya jaddada cewa zai yi iya bakin ƙoƙarinsa wajen tafiya da kowa ba tare da nuna wariya ba matukar ya samu nasara a zaɓe mai zuwa.
Gwamnan Ondo ya gana da Malamai
A wani rahoton, kun ji cewa gwamnan Ondo, Lucky Aiyedatiwa ya yi wata ganawa da shugabannin Musulunci yayin da zaben jihar ke kara matsowa.
Malaman addinin Musulunci a jihar Ondo sun ce kamar yadda suka goyi bayan Bola Tinubu za su kara goyon bayan Aiyedatiwa.
Muhammad Malumfashi, babban edita a sashen Hausa na Legit ya duba labarin.
Asali: Legit.ng
