NNPP: Jam'iyyar Kwankwaso Ta Buɗe Kofa, Za a Yi Wa Tinubu Taron Dangi a 2027

• Jam'iyyar NNPP ta ce ƙofofinta a bude suke ga dukkan jam'iyyun da suke son haɗa kai da ita domin kawo karshen mulkin APC a 2027
• Shugaban NNPP na ƙasa, Ajuji Ahmed ne ya bayyana hakan a wurin taron kaddamar da yakin zaben ɗan takarar gwamna a Ondo
• Ya buƙaci hukumar zaɓe mai zaman kanta ta ƙasa, INEC ta ba kowace jam'iyya dama a zaɓen da za a yi ranar 16 ga watan Nuwamba

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Ondo - Jam'iyyar NNPP ta bayyana cewa a shirye take ta ƙulla ƙawance da sauran jam'iyyun siyasa a ƙasar nan domin kifar da APC a babban zaɓen 2027.

Shugaban NNPP na kasa, Dakta Ajuji Ahmed ne ya sanar da hakan a wurin kaddamar da kamfen ɗan takarar jam'iyyar a zaben gwamnan jihar Ondo.

Kara karanta wannan

Zaben 2027: NNPP ta zargi APC da rura wutar rikici a sauran jam'iyyu

Ajuji Ahmed ya yi ikirarin cewa APC na yin duk da mai yiwuwa domin ta sake samun nasara a babban zaɓen 2027 mai zuwa, Leadership ta ruwaito.

NNPP: "Ya kamata yan adawa su tashi tsaye"

A cewarsa, APC ta daɗe tana rura wutar rikici a tsakanin ƴaƴan jam'iyyun adawa domin kawai ta raba kawunansu ta yadda ba za su kai labari ba a zaɓe.

"APC na yin duk mai yiwuwa domin ganin ta lashe zaben 2027, muna da shaidar ita ke tada rikici a jam'iyyun adawa, saboda haka ya kamata mu farka.

"Ya kamata APC ta fara shirin barin gadon mulki bayan ƙarewar wa'adin Tinubu. NNPP ta fara haɗa kai da nufin ƙulla kawance da jam'iyyun adawa gabanin zaɓen 2027.

"Don haka, kofofinmu a bude suke ta yadda idan har za a haɗa kai ta jam’iyyun siyasa, a shirye muke mu yi hakan.”

Kara karanta wannan

"Har yanzu yana jin raɗaɗin 2023," Jigon PDP ya kwancewa tsohon gwamna zani a kasuwa

- Ajuji Ahmed.

Jam'iyyar NNPP ta fara kamfe a jihar Ondo

Dangane da batun zaɓen gwamnan Ondo da za a yi a watan Nuwamba, shugaban NNPP ya roki hukumar zaɓe INEC ta ba kowace jam'iyya dama ba tare da nuna wariya ba.

Ya kuma yi kira ga al'ummar jihar Ondo su fito kwansu da kwarkata su zaɓi ɗan takarar jam'iyyar NNPP a ranar 16 ga watan Nuwamba, 2024.

NNPP ta haskawa Tinubu hanyar ceto Najeriya

A wani rahoton kuma jam'iyyar NNPP ta samo mafita ga shugaban ƙasa Bola Ahmed Tinubu kan taɓarɓarewar da tattalin arziƙin ƙasar nan ya yi.

NNPP ta buƙaci shugaba Tinubu da ya nemi taimakon tsohon shugaban ƙasa, Goodluck Jonathan kan yadda zai shawo kan halin da ake ciki.

Muhammad Malumfashi, babban edita a sashen Hausa na Legit ya duba labarin.

Asali: Legit.ng