Shugaban PDP Na Ƙasa Ya Fusata, Ya Yi Magana kan Yiwuwar Ya Yi Murabus
- Shugaban jam'iyyar PDP na ƙasa, Umar Damagum, ya ce yana nan daram babu wanda zai tsorata shi ya yi murabus daga muƙaminsa
- Damagum ya nuna danuwa kan mutanen da ke ta surutu ba tare da sanin yadda ake tafiyar da harkokin kwamitin gudanarwa ba
- Ya ce masu sukarsa suna ƙara masa farin jini ne a wurin jama'a kuma har ya fara tunanin tsayawa takarar shugaban ƙasa
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
FCT Abuja - Muƙaddashin shugaban PDP na ƙasa, Ambasada Umar Damagum ya mayar da martani kan kiraye-kirayen da ake masa na ya yi murabus.
Umar Damagum ya bayyana cewa babu wata matsin lamba da za ta sa haka kurum ya yi murbaus daga matsayin shugaban PDP na ƙasa.
![Ambasada Umar Damagum. Ambasada Umar Damagum.](https://cdn.legit.ng/images/1120/fc7d1de58198b404.jpeg?v=1)
Asali: Twitter
Yadda jam'iyyar PDP ke fama da rigingimu
Punch ta tattaro cewa babbar jam'iyyar adawa PDP na shan fama da rikice-rikicen cikin gida kafin da kuma bayan babban zaben 2023.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Wasu jiga-jigai da ƴaƴan jam'iyyar PDP na ganin Damagum na da hannu a rura wutar rikicin da suka ƙi ci suka ƙi cinyewa a jam'iyyar.
A ƴan kwanakin nan, kiraye-kiraye sun ƙaru kan shugaban PDP ya yi murabus domin jam'iyyar ta dawo kan hanya.
PDP: Umar Damagum ya maida martani
Yayin da yake mayar da martani a sakatariyar jam'iyyar da ke Abuja, Umar Damagum ya ce babu wanda zai ba shi tsoro ya sauka daga muƙaminsa.
Shugaban PDP ya yi wannan furucin ne a taron kaddamar da kwamitocin sulhu da ladabtarwa wanda Olagunsoye Oyinlola da Tom Ikimi za su jagoranta.
Damagum ya ce:
"Wannan saƙo ne ga dukkan masu ɗorawa Damagum laifi, Damagun kaza Damagun kaza, ku sani ba za ku iya tsoratar da ni ba, kuna ambatar sunana ina ƙara farin jini.
Shugaban PDP ya nuna damuwa
Ya kara da cewa sukar da ake yi masa ta sa ya kara farin jini har ma yana tunanin tsayawa takarar shugaban kasa saboda yadda sunansa ya yaɗu a wurin al'umma.
Damagum ya nuna damuwa game da mutanen da ba su san ayyukan kwamitin gudanarwa na kasa ba amma suna yada bayanan karya ga jama'a, cewar Daily Trust.
Jigon PDP ya buƙaci a kori Wike
A wani rahoton kuma ministan harkokin Abuja, Nyesom Ezonwo Wike na cigaba da shan kakkausar suka daga masu ruwa da tsakin jam'iyyar PDP.
Tsohon ministan na tarayya, Cif Edwin Clark ya bukaci a kori Nyesom Ezonwo Wike daga PDP domin ganin jami'yyar ta samu ci gaba.
Muhammad Malumfashi, babban edita a sashen Hausa na Legit ya duba labarin.
Asali: Legit.ng