Tinubu vs Atiku: Jigon APC Ya Yi Magana Kan Yadda Hukuncin Kotu Zai Kaya

• Wani jigon jam'iyyar All Progressives Congress (APC) ya yi magana kan ƙarar da Atiku Abubakar ya ke yi wa Shugaba Tinubu a Amurka
• A halin da ake ciki, jami'ar jihar Chicago, ta bayyana cewa za ta saki takardun karatun Shugaba Tinubu idan kotu ta bayar da umarni
• Da yake martani, Aaron Artimas, kakakin jam'iyyar APC a jihar Taraba, ya bayyana cewa ƙarar ta Atiku a kan Shugaba Tinubu ba za ta taka rawa ba wajen hukuncin da za a yanke a Najeriya

Jalingo, jihar Taraba - Aaron Artimas, kakakin jam'iyyar All Progressives Congress (APC), ya bayyana cewa ƙarar da Atiku Abubakar ya ke yi a kan Shugaba Tinubu a kotun Amurka, ba ta da wani muhimmanci kan hukuncin da za a yanke a kotun zaɓen shugaban ƙasa.

Kara karanta wannan

Juyin Mulkin Nijar: Shugaba Tinubu Ya Tarbi Wakilan Amurka, Ya Bayyana Sabbin Bayanai Kan Matsayar ECOWAS

A cikin ƴan kwanakin nan, ɗan takarar shugaban ƙasa na jam'iyyar Peoples Democratic Party (PDP), Atiku Abubakar, ya shigar da ƙara a kotun Illinois a Chicago, ƙasar Amurka, domin neman tilasta jami'ar jihar Chicago ta saki takardun karatun Shugaba Tinubu.

Da yake martaninsa, Mr. Artimas a wata hira da Legit.ng a ranar Lahadi, 27 ga watan Agusta, ya bayyana cewa ƙarar ta Atiku babu wata rawa da za ta taka wajen hukuncin da za a yanke a shari'ar zaɓen shugaban ƙasa.

Kakakin ya bayyana ƙarar ta Atiku a matsayin abin mamaki, inda ya ƙara da cewa ba ta da wani amfani ta fuskar shari'a.

Mr. Artimas ya bayyana cewa:

"Ƙarar Atiku Abubakar abin mamaki ce kawai sannan babu wata rawa da za ta taka a kan ƙarar zaɓen shugaban ƙasa. Lokaci ya ƙure masa."

Kara karanta wannan

"Saura Kiris": Babban Malamin Addini Ya Bayyana Yadda Peter Zai Karbe Mulki a Hannun Shugaba Tinubu

Atiku vs Tinubu: "maganar karatu ce kawai" inji kakakin APC

Kakakin na jam'iyyar APC ya nuna kuskuren ƙarar ta Atiku a kan Shugaba Tinubu. A cewarsa tsohon mataimakin shugaban ƙasar yana da babban aiki a gabansa a ƙoƙarin da ya ke yi na ƙalubalantar nasarar Tinubu a kotu.

Mr. Artimas ya yi nuni da cewa ƙarar ta Atiku magana ce kawai ta karatu domin sanya mutane su yi alamar tambaya a kan mutuncin Shugaba Tinubu.

Shugaba Tinubu Ya Bayyana Matsayar ECOWAS

A wani labarin kuma, shugaban ƙasa Bola Ahmed Tinuɓu ya bayyana matsayar ECOWAS kan rikicin Jamhuriyar Nijar.

Shugaban ƙasar ya bayyana cewa yaƙi ba abun so bane amma dole ne a kare dimokuraɗiyya a ƙasar.

Asali: Legit.ng