Zaben 2023: 'Yan Takarar Jam'iyyun ADC Da PDP Sun Maka Gwamnan Gombe a Gaban Kotu

• Ƴan takarar jam'iyyun PDP da ADC a zaɓen gwamnan jihar Gombe, ba su haƙura da.kashin da suka sha ba a zaɓen
• Ƴan takarar biyu sun garzaya gaban kotun sauraron ƙararrakin zaɓen jihar domin ƙalubalatar nasarar Inuwa Yahaya
• Kotun sauraron ƙararrakin zaɓen jihar, za ta fara zama domin sauraron ƙararrakin a sati mai zuwa

Jihar Gombe - Ƴan takarar zaɓen gwamnan jihar Gombe, na jam'iyyun Peoples Democratic Party (PDP) da African Democratic Congress (ADC), Jibrin Barde da Nafi’u Bala, sun maka gwamnan jihar, Muhammad Inuwa Yahaya, a gaban kotun sauraren ƙararrakin zaɓe.

Jaridar Punch ta tattaro cewa Barde da Bala sun garzaya gaban kotun bayan bayyanar sakamakon zaɓen gwamnan jihar na shekarar 2023.

A takardar ƙarar da Barde ya shigar a gaban kotun, waɗanda aka sanya a cikin ƙarar sun haɗa da hukumar zaɓe mai zaman kanta ta ƙasa (INEC), Inuwa Yahaya da jam'iyyar sa ta All Progressives Congress (APC), cewar rahoton Headtopics.

Kara karanta wannan

Kuma Dai: An Shigar Da Wata Sabuwar Karar Neman a Hana Rantsar Da Tinubu a Matsayin Magajin Shugaba Buhari

Wani ɓangare na ƙarar na cewa:

"Mai shigar da ƙara na farko, Jibrin Muhammad Barde, wanda ya yi zaɓe ya ke da ƴancin yin zaɓe sannan a zaɓe sa, ɗan takara ne a zaɓen gwamnan jihar Gombe, wanda aka gudanar a ranar 18 ga watan Maris na shekarar 2023."

"Mai shigar na ƙara na farko ya yi takara a zaɓen a ƙarƙashin jam'iyya sannan mai shigar da ƙara na biyu ya ɗauki nauyin sa, sannan ya ce yana da ƴancin a ayyana shi a matsayin wanda ya lashe zaɓen."

"Mai shigar da ƙara na biyu, jam'iyyar PDP, jam'iyyar siyasa ce mai rajista a Najeriya wacce ta ɗauki nauyin mai shigar da ƙara na farko ya yi takara a zaɓen gwamnan jihar Gombe wanda aka gudanar a ranar 18 ga watan Maris 2023."

Kara karanta wannan

Zaben Gwamna: Jerin Sunayen Manyan 'Yan Takarar Da Za Su Fafata a Zaben Gwamnan Jihar Kogi

Za a fara sauraron ƙarar

Wani majiya a kotun wanda ya nemi a sakaya sunan sa, ya bayyana cewa a ranar Talata mai zuwa kotun za ta fara zaman ta.

"Za mu fara zaman mu na farko a ranar 2 ga watan Mayun 2023, da misalin ƙarfe 9 na safe. Idan kuka zo za ku ga yadda zaman zai kaya." A cewarsa.

Hukumar EFCC Za Ta Sake Maka Tsohon Minista a Gaban Kotu

A wani labarin na daban kuma, hukumar EFCC za ta sake gurfanar da tsohon ministan sufuri, Femi Fani-Kayode a gaban kotu.

EFCC na tuhumar Fani-Kayode da tsohuwar ministan kuɗi, Nenadi Usman, da almundahana da dukiyar ƙasa wacce ta kai N4.6bn.

Asali: Legit.ng