APC Ta Zamfara Ta Ba Tinubu Da Sauran Yan Takara Sharadi Daya Idan Suna Son Kuri'arta a 2023

• Masu ruwa da tsaki da mambobin jam'iyyar APC mai mulki a Zamfara sun mika muhimmin sako ga Tinubu da sauran yan takara
• Jam'iyyar ta APC ta bukaci Tinubun da sauran wadanda ke neman kujerun takara su yi alkawarin magance matsalar tsaro a jihar idan suna son kuri'unsu
• Yan APCn na Zamfara sun mika sakonsu ne ga Malam Salihu Lukman, mataimakin shugaban APC na kasa, yayin ziyarar gano-gaskiya da ya kai a jihar gabanin zabe

Zamfara - Masu ruwa da tsaki da mambobin APC ta Jihar Zamfara ta bukaci a kawo karshen yan bindiga da rashin tsaro a matsayin sharadin zaben dan takarar APC, Bola Tinubu, da sauran yan takarar.

Sun bayyana matsayarsu ne a ranar Laraba da yamma yayin wani ziyarar gano gaskiya da tawagar APC ta Yamma ta kai jihohi bakwai na yankin, rahoton The Punch.

Kara karanta wannan

2023: PDP ta yi dabara, ta zabo wanda zai kawo karshen APC a Gombe, inji tsagin dan takara

Matakin na zuwa ne kimanin watanni bakwai kafin babban zaben shekarar 2023 da aka shirya yi a ranar 25 ga watan Fabrairu.

An fitar da sanarwar ne a daren ranar Laraba da bakin sakataren watsa labarai na yankin arewa maso yamma, Musa Mailafiya Mada, yayin taron da tawagar Malam Salihu Lukman ta jagoranci masu ruwa da tsaki a Birnin Kebbi babban birnin jihar Kebbi.

Sanarwar ta ce masu ruwa da tsaki na jam'iyyar a jihar sun bawa ciyaman din yankin Malam Salihu Lukman da tawagarsa cewa suna tare da su kuma za su bawa jam'iyyar goyon bayan da ta ke bukata.

A cewarsu, Zamfara jiha ce ta APC tun lokacin da ta ke APP/ANPP a shekarar 1999.

"Amma, masu ruwa da tsaki na jam'iyyar sun gabatar da sharadi mai muhimmanci na magance matsalar tsaro a jihar daga duk wanda ke neman takara musamman dan takarar shugaban kasa idan yana son jam'iyyar ta masa aiki ya samu nasara," in ji su.

Kara karanta wannan

Mance da su Ganduje da El-Rufai: Ka zabi abokin takara da Arewa ta tsakiya, jiga-jigan APC ga Tinubu

Martanin Malam Salihu Lukman

Mataimakin shugaban jam'iyyar APCn na kasa a shiyyar Arewa maso Yamma, Malam Salihu Lukman, ya yi alkawarin mika bukatunsu da wadanda abin ya shafa ba tare da jinkiri ba.

Salihu ya yi alkawarin zai tattara rahoton abubuwan da suka tattauna ya gabatarwa shugaban jam'iyyar na kasa Abdullahi Adamu bayan kammala ziyarar.

Ya kuma yi musu godiya bisa goyon baya da suka bawa jam'iyyar.

2023: Idan Har Ka Ajiye Okowa, Ba Zaka Samu Kuri'an Igbo Ba, Matasan Ohanaeze Sun Gargadi Atiku Da PDP

A wani rahoton, matasan Igbo karkashin kungiyar Ohanaeze Ndigbo Youth Council Worldwide, OYC, ta gargadi dan takarar shugaban kasa na PDP, Atiku Abubakar kan duk wani shiri na ajiye Gwamna Ifeanyi Okowa a matsayin abokin takararsa.

A cikin da shugabannin kungiyar suka raba wa yan jarida a ranar Talata, ta ce idan Atiku ya ajiye Okowa, duk abin ya faru, shi ya janyo, rahoton Vanguard.

Asali: Legit.ng