Mutane na cikin Hada Hada, Gobara Ta Sake Kamawa Rigi Rigi a Fitacciyar Kasuwa a Kano

• A karo na biyu cikin kasa da makonni biyu, kasuwar Singa da ke cikin jihar Kano ta sake fuskantar ibtila'in gobara yau Asabar
• Rahotanni daga yan kasuwa sun nuna cewa gobarar ta kama ne a sashen Gidan Glass da misalin karfe 4:00 na yamma
• Babu wata sanarwa a hukumance kawo yanzu amma majiyoyi sun tabbatar da cewa motar 'yan kwana-kwada daya kacal ta ka dauki kasuwar

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Kano, Nigeria - Rahotanni sun nuna cewa 'yan kasuwa sun sake gamuwa da ibtila'in gobara a fitacciyar kasuwar nan ta Singa da ke cikin birnin Kano.

An ruwaito cewa gobarar ta lalata shaguna da dama a sashen Gidan Glass na kasuwar da ke kan titin Ado Bayero, kusa da Murtala Muhammad Way.

Jaridar Daily Trust ta ruwaito cewa lamarin, wanda ya fara da yammacin ranar Asabar, 14 ga watan Fabrairu, 2026, shi ne karo na biyu da gobara ke tashi a kasuwar cikin ƙasa da makonni biyu.

Kara karanta wannan

'Yan bindiga 200 sun shiga garuruwa 3 da Asubah, sun kashe mutane sama da 30

Gobara ta kama a kasuwar Singa

Wani ɗan kasuwa, Nasir Maharazu, ya shaida wa manema labarai cewa gobarar ta fara ne da misalin ƙarfe 4:00 na yamma, kuma har zuwa lokacin da ake haɗa wannan rahoto, wutar na ci gaba da ci a Singa.

Ya ce:

“Yanzu da nake magana da ku, ina ganin wutar tana ci. Dukkan ginin bene mai hawa biyu ya kama da wuta. Wannan gobara ma ta fi wadda ta tashi a kasuwar cikin makonni biyu da suka gabata muni.”

A lokacin haɗa wannan rahoto, an ga motar kashe gobara guda ɗaya kacal a wurin da lamarin ya faru.

Kasuwar Singa ita ce mafi girman kasuwar kayan abinci a Kano da ma Arewacin Najeriya, tana samar da kayan masarufi da abinci ga yawancin jihohin Arewa da ma wasu ƙasashen Yammaci da Tsakiyar Afirka.

Karin bayani na nan tafe...

Asali: Legit.ng