Gwamnatin Kano Ta Shige Gaba don Shari'a kan Kisan Matar Aure da Yaranta 6

• Gwamnatin Kano ta tabbatar da cewa za ta jagoranci shigar da ƙara kan kisan matar aure da ƴaƴanta shida a Dorayi Chiranchi
• A ranar Asabar 17 ga watan Janairu, 2026 ne wasu bata-garin matasa uku suka shiga gidan Fatima Abubakar, aka kashe ta
• Kafin wannan lokaci, gwamnatin Kano ta bayyana cewa za ta yi tsayin daka har an tabbatar da adalci a kan kisan Fatima da yaranta bakwai

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

Jihar Kano – Gwamnatin Jihar Kano ta bayyana aniyarta ta jagoranci shigar da ƙara kan mummunan kisan gillar da aka yi wa wata matar aure da ƴaƴanta shida a unguwar Dorayi Chiranchi da ke cikin birnin Kano.

Lamarin ya girgiza zukatan jama’a tare da jefa daukacin jihar cikin alhini mai tsanani a yayin da har yanzu, mutane ke cikin alhinin faruwar lamarin.

Kara karanta wannan

Badakalar fansho: Abdulrasheed Maina ya shaki iskar 'yanci bayan shekaru 8 a garkame

BBC Hausa ta ruwaito cewa gwamnatin ta ce abin da ya faru ba wai kawai laifi ba ne, babban cin zarafi ne ga bil’adama da kuma take doka.

Gwamnati ta tsayawa marigayiya Fatima da yaranta

Gwmnati ta bayyana kisan a matsayin aikin rashin tausayi da rashin imani da ya girgiza tunanin al’ummar Kano, tare da haifar da fargaba da damuwa game da tsaron rayuka.

Wannan matsaya ta fito ne a cikin wata sanarwa da Babban Lauyan Jihar Kano kuma Kwamishinan Shari’a, Abdulkarim Kabiru Maude, SAN, ya fitar bisa umarnin Gwamna Abba Kabir Yusuf.

A cikin sanarwar, gwamnatin jihar ta miƙa ta’aziyya ga iyalan mamatan tare da jajantawa al’ummar Kano baki ɗaya kan wannan mummunan lamari.

Ta tabbatar wa iyalan da abin ya shafa cewa ba za a barsu su fuskanci wannan jarabawa su kaɗai ba, dole a tsaya masu domin tabbatar da adalci.

Kara karanta wannan

Abubakar Malami ya yi magana game da makamai da DSS ta gano a 'gidansa' na Kebbi

Ya ce:

“Gwamnati na tare da iyalan da wannan lamari ya shafa, kuma za ta yi duk mai yiwuwa don ganin an yi adalci."

Ya kuma jaddada cewa gwamnati za ta bayar da cikakken goyon baya ga duk wani mataki da zai kai ga hukunta wadanda suka aikata wannan laifi.

Gwamnatin Kano na cikin alhini

Gwamnatin ta bayyana cewa wannan kisa ya saba wa kimar dan Adam, addini, da al’adun al’umma, tare da yin kira ga jama’a da su kwantar da hankalinsu su bar doka ta yi aikinta.

Haka kuma, gwamnatin Kano ta yaba wa rundunar ƴan sandan jihar bisa gaggawar ɗaukar matakin bincike da ya kai ga kama manyan waɗanda ake zargi da aikata laifin.

Ta ce saurin matakin da ƴan sanda suka ɗauka ya nuna jajircewar hukumomin tsaro wajen yaki da laifuffuka masu muni.

Sanarwar ta ce wannan nasara a bincike na taimakawa wajen dawo da amincewar jama’a ga hukumomin tsaro da tsarin shari’a.

Kara karanta wannan

Makwabtan Fatima da aka kashe da yaranta 6 a Kano sun fusata rundunar 'yan sanda

A cewar Babban Lauyan Jihar, Ofishin Babban Lauya zai jagoranci shari’ar tare da kafa tawagar lauyoyi ta musamman.

Manufar hakan ita ce tabbatar da cewa an gudanar da shari’a cikin gaskiya, sauri, da bin ka’idojin doka, domin ganin adalci ya tabbata ga mamatan da iyalansu.

Gwamnatin Kano ta kammala da jaddada kudirinta na kare rayuka da dukiyoyin al’umma, tare da tabbatar da cewa duk wanda ya aikata laifi zai fuskanci hukunci bisa doka.

Jama'a sun shiga dimuwa a Kano

Mazauna Kano da ma wasu sassan Arewacin Najeriya sun shiga damuwa saboda kisan gillar da aka yi wa uwa da yaranta Chiranchi Dorayi.

Zainab Badamasi Shakallo, 'yar jarida da ta ziyarci gidan ta shaida cewa:

"Da kyar na iya barci, ina ta tsoron za a hauro mana. Dan karamin ne ya tsaya min a rai, duk jikin shi ya kukkuje. sauran kuma yawanci kwakwalwarsu ta fito."

Ta ce ta yi imanin mazauna Kano da sauran sassan kasar nan na fatan za a tabbatar da adalci da zai 'dan sanyaya wa mutane a kan wannan rashin imani.

Kara karanta wannan

Trump ya tsorata da barazanar kashe shi, ya yi alwashin shafe Iran a duniya

An kama matasan da suka kashe matar aure

A wani labarin, kun ji cewa rundunar ’yan sandan Kano ta tabbatar da kama wasu mutane uku da ake zargi da hannu a kisan Fatima Abubakar da yaranta a birnin Kano a ranar Asabarm 17 ga watan Janairu, 2026.

Kakakin rundunar ’yan sandan jihar, CSP Abdullahi Kiyawa, ne ya bayyana hakan a wata sanarwa da ya fitar ga manema labarai a ranar Lahadi 18 ga watan Janairu, 2026 inda ya ce jami'an tsaro sun yi aiki.

A cewar Kiyawa, rundunar ta dauki matakan tsaro na gaggawa bayan faruwar lamarin, domin bin sawun wadanda ake zargi da kuma tabbatar da cewa an kamo su ba tare da bata lokaci ba.

Asali: Legit.ng