Kamfanin NNPCL Ya Sanar da Sauke Farashin Litar Man Fetur

• Kamfanin NNPCL ya sanar da sake rage farashin litar man fetur da N20 a gidajen mansa, matakin da zai shafi masu saye da sayarwa
• Sabon farashin ya fara bayyana ne a wasu manyan gidajen mai a Abuja, inda aka ce matakin ya biyo bayan umarnin da aka ba kamfanin
• Duk da wannan ragin da aka samu, farashin NNPCL har yanzu ya fi na wasu gidajen mai da ke samun kaya daga matatar Dangote

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja - Kamfanin man Najeriya na NNPCL ya sake rage farashin man fetur da N20 a gidajen mai da ke karkashinsa, sauyin ya zo ne a wani sabon yunƙuri na daidaita farashi.

Binciken da aka gudanar a wasu gidajen mai na NNPC a birnin tarayya Abuja ya nuna cewa yanzu ana sayar da litar man fetur a kan N815, maimakon N835 da ake sayarwa a baya.

Kara karanta wannan

Mamdani: Musulmin da ya ci zabe ya ruguza shirin Isra'ila a Amurka

Tribune ta wallafa cewa majiyoyi daga cikin kamfanin sun bayyana cewa sauke farashin ya biyo bayan wani umarni na cikin gida da aka amince da shi a daren Lahadi, 4 ga Janairun 2026.

Inda aka fara ganin sabon farashin mai

Rahotanni sun nuna cewa sabon farashin N815 kan kowace lita ya fara bayyana a gidajen mai na NNPC da ke Wuse Zone 4 da Zone 6, da ke kan hanyar Keffi–Abuja, da kuma wasu gidajen mai da ke kan Kubwa Expressway.

Masu saye sun tabbatar da cewa sauyin farashin ya zo musu a matsayin rangwame, duk da cewa har yanzu suna kwatanta shi da farashin da ake samu a wasu gidajen mai masu zaman kansu.

Sai dai duk da wannan ragi, farashin man fetur a gidajen mai na NNPC ya kasance ya fi na wasu gidajen mai da ke sayar da lita a N739, wanda hakan ke nuna tazara mai yawa a tsakaninsu.

Kara karanta wannan

Sojoji sun kutsa dajin Sambisa, sun yi kaca kaca da Boko Haram

Bambancin farashin man fetur a Najeriya

Gidajen mai na MRS, waɗanda ke samun man fetur daga matatar Dangote, na sayar da litar mai a farashin N739 a faɗin ƙasa. Wannan ya sanya farashin NNPC ya kasance ya fi na su da N79.

Rahotanni sun nuna cewa matatar Dangote ta taka rawa wajen sauya yanayin kasuwar man fetur a ’yan makonnin nan, inda rage farashin da ta yi ya jawo gasa mai tsanani tsakanin ’yan kasuwa.

Wannan gasa ta sa kamfanoni da dama ke sake duba farashinsu domin jawo hankalin masu saye, musamman a manyan birane da ake yawan saye da sayarwa.

NNPC ya rage farashin man fetur

A wani labarin, kun ji cewa NNPCL ya rage farashin man fetur da N80 a ranar 19, Disamba, 2025, inda farashin ya sauka zuwa N835 kan kowace lita a wancan lokacin.

Ragin da aka yi a wancan lokaci ya biyo bayan tsananin gasa da ta ɓarke a kasuwar man fetur, bayan matatar Dangote ta rage farashin mai zuwa N699 kan kowace lita.

Ana ganin cewa ci gaba da wannan gasa na iya sa a samu ƙarin sauye-sauye a farashin man fetur a nan gaba, yayin da kamfanoni ke ƙoƙarin daidaita ribarsu da kuma jan hankalin masu saye.

Asali: Legit.ng