Abubuwan da Idris Dutsen Tanshi Ya Fada kan Rashin Lafiya da Mutuwa kafin ya Cika

• Sheikh Idris Abdulaziz ya bayyana cewa rashin lafiyarsa ko komawarsa ga Mahalicci ba zai hana ci gaba da yada da’awar gaskiya ba
• Dutsen Tanshi ya ƙara da tunatar da jama'a cewa dukkanin ɗan Adam zai koma ga Allah Sarki (SWT), domin babu wanda zai dawwama
• Malamin ya nanata cewa ba zai taɓa koyar da ƙarya ba, ko ya goyi bayanta, ko ya yada ta, ko kuma ya faɗe ta da gangan ga al'ummar Musulmi ba
• Ya amince cewa ɗan Adam mai kuskure ne, amma kuskurensa ba yana nufin yana yada ƙarya ba ne, sai dai saboda rauninsa irin na ɗan Adam

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

Jihar Bauchi – Fitaccen malamin addinin Musulunci, wanda ya rasu a daren Juma’a, Dr. Idris Abdulaziz Dutsen Tanshi, ya taba magana kan masu yada jita-jita game da rashin lafiyarsa kafin rasuwarsa.

Kara karanta wannan

Abin da Sheikh Bala Lau ya fada bayan rasuwar Dr Idris Dutsen Tanshi

Ya bayyana cewa rashin lafiyarsa, ko ma komawarsa ga Mahalicci, ba zai hana ci gaba da yaduwar da’awa ta gaskiya da tunatar da al’umma abubuwan da addini ya yi umarni da su ba.

A wani bidiyo da Sani Abdullahi Mu’az ya wallafa a shafinsa na Facebook, Sheikh Dutsen Tanshi ya dauki alkawari cewa ba zai taɓa koyar da karya ko yada abin da Allah ya hana ba.

"Kowa zai koma ga Mahalicci" Dutsen Tanshi

Marigayi Sheikh Dutsen Tanshi ya yi gargadi ga masu murna da jinyarsa a lokacin da ba shi da lafiya, inda ya bayyana cewa babu wata halitta da za ta dawwama a doron ƙasa.

Ya ce:

"Amma don motar gawa ta wuce kai dariya, to gobe kai za a ɗauka, ko ba ka gane ba ne? Kar ka yi farin ciki da rashin lafiyar Idrisu. Manzon Allah (SAW) ya yi rashin lafiya, ya kuma rasu. Ko ba haka ba ne? To wa zai yi saura?"

Kara karanta wannan

"Bello Turji ya kusa mutuwa," Dakarun Sojojin Najeriya sun yunƙuro da zafi zafi

"Mun zo zama ne? Wallahi ba wanda ya zo zama. Lokaci kawai ake jira. Kowa idan lokacinsa ya yi, zai tafi."

Dutsen Tanshi: "Dan Adam mai kuskure ne"

A cikin daya daga cikin karatunsa, Sheikh Dutsen Tanshi ya bayyana yakinin cewa za a ci gaba da da’awar gaskiya har bayan rasuwarsa, kuma masu karɓar gaskiya za su ci gaba da karɓarta.

Ya jaddada cewa:

"Mun ɗauki alkawarin cewa za mu gaya wa mutum gaskiya, ko waye kuwa — tsakaninmu da mutum gaskiya. Kuma duk abin da zai fito daga bakina, wallahi iya imani na, gaskiya ne."

"Idan kuma an samu kuskure, dan Adam dai mai kuskure ne. Amma ni ba zan ganganta yin karya ba, ba zan ganganta faɗin karya ba, ba zan ganganta goyon bayan karya ba."

Ya ƙara da cewa:

"Dama dan Adam mai rauni ne. Saboda haka, idan ya yi kuskure, wannan ba yana nufin yana da niyyar faɗin karya ba ne."

Kara karanta wannan

'Yadda watsi da shirin Sardauna ke jawo asarar rayukan Hausawa,' Yan kasuwa kan kisan Edo

Abubuwan da Dutsen Tanshi ya ginu a kai

A baya, mun wallafa cewa a daren Alhamis, 3 ga watan Afrilu, Allah ya karɓi rayuwar fitaccen malamin addinin Musulunci, Dr. Idris Abdulaziz Dutsen Tanshi, lamarin da ya girgiza musulmi.

Marigayin ya shahara wajen yaɗa ilimin Tauhidi da wa’azin gaskiya, kuma yana daga cikin malaman da suka kafa tarihi a fagen faɗakar da al’umma ta hanyar karatu da huduba.

Wanda ya tantance Muhammad Malumfashi, babban edita a Legit.ng.

Asali: Legit.ng