'Yan Ta'addan Boko Haram Sun Kai Hari a Borno, Sun Yi Gagarumar Barna

• Ƴan ta'addan Boko Haram sun kai farmakin ta'addanci a wani ƙauyen jihar Borno da ya yi shekara da shekaru ana fama
• Tsagerun ƴan ta'addan na Boko Haram sun kai harin ne a ƙauyen Kaleri na ƙaramar hukumar Mafa, suka yi awon gaba da mutum biyu
• Kakakin rundunar ƴan sandan jihar Borno, ya tabbatar da aukuwar lamarin inda ya ce ana ci gaba da gudanar da bincike

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Borno - Wasu da ake zargin ƴan ta’addan Boko Haram ne sun kai hari a ƙauyen Kaleri da ke ƙaramar hukumar Mafa a jihar Borno.

Ƴan ta'addan a yayin harin sun sace mutane biyu tare da kwashe dukiyoyi daga gidajen mazauna yankin.

Jaridar The Punch ta rahoto cewa maharan ɗauke da makamai sun mamaye ƙauyen ne da yammacin ranar Talata.

Kara karanta wannan

'Yan ta'addan Boko Haram sun zo da sabon ta'addanci, sun tafka barna a Adamawa

Ƴan ta'addan sun buɗe wuta ba ƙaƙƙautawa, lamarin da ya tilastawa jama’a guduwa don tsira da rayukansu.

Ƴan sanda sun yi magana kan harin Boko Haram

Mai magana da yawun ƴan sandan jihar Borno, ASP Nahum Daso, ya tabbatar da harin, inda ya bayyana shi a matsayin yunƙurin yin garkuwa da mutane.

"An kai hari a Kaleri. Wasu da ake zargin ƴan Boko Haram ne suka kutsa cikin wani gida suka yi garkuwa da mutane biyu."

- ASP Nahum Daso

Da aka tambaye shi ko an tura ƙarin jami’an tsaro zuwa yankin, sai ya ka da baki ya ce:

"Ana ci gaba da bincike, kuma zan tuntuɓi DPO don samun ƙarin bayani domin sanar da jama’a."

Majiyoyi sun yi bayani kan harin

Wani mazaunin garin da ya buƙaci a sakaya sunansa saboda dalilan tsaro ya bayyana cewa maharan sun shigo da manyan makamai kuma sun yi ta kwasar kayan abinci daga gidaje daban-daban.

Kara karanta wannan

An shiga jimami bayan 'yan sanda sun rasu yayin artabu da 'yan bindiga

"Da isowarsu, sai suka fara harbe-harbe, hakan ya sa kowa ya tsere. Bayan komai ya lafa, sai muka gano cewa sun tafi da mutane biyu."

- Wata majiya

Wata majiya kuma ta tabbatar da cewa maharan sun bi gida-gida suna bincike, inda suka riƙa kwasar abinci da dukiyoyin mutane kafin su tsere.

"Sun shigo da yawa, sannan sun ɗauki kayayyaki da dama kafin su bar ƙauyen."

- Wata majiya

Bayan harin, jami’an tsaro sun kewaye yankin kuma sun cafke wasu mutane da ake zargi.

Sai dai har yanzu ba a tabbatar da ko mutanen da aka kama na da alaƙa da harin ba.

Ba a samu tabbacin sunayen mutanen da aka sace ba har zuwa lokacin kammala haɗa wannan rahoton.

Ƴan Boko Haram sun ƙona gidaje

A wani labarin kuma, kun ji cewa wasu ƴan ta'addan Boko Haram sun kai hare-haren ta'addanci a wasu ƙauyukan jihar Adamawa.

Kara karanta wannan

Dakarun sojoji sun samu nasara kan 'yan bindiga, sun yi raga raga da miyagu

Ƴan ta'addan sun ƙona gidaje, makarantu da shaguna a hare-haren waɗanda suka kai ƙauyukan guda biyu na ƙaramar hukumar Hong.

Dakarun sojojin Najeriya sun kai ɗauki bayan samun rahoton harin inda suka yi artabu da ƴan ta'addan na Boko Haram.

Muhammad Malumfashi, babban edita a sashen Hausa na Legit ya duba labarin.

Asali: Legit.ng