Kasafin 2025: Bayanai Sun Fara Fitowa, Tinubu Ya Ware Sama da N15bn don Sayo motoci

• Alƙaluman kasafin kuɗin 2025 da Bola Ahmed Tinubu ya gabatar a zaman haɗin guiwa na Majalisar tarayya sun fara fitowa
• Fadar shugaban ƙasa ta ware Naira biliyan 15.09 domin sayo motocin SUV, tayoyi, ƙananan motoci da gina ofisoshin hadiman Tinubu a 2025
• Haka nan Tinubu ya kuma ware sama da Naira biliyan 5 na aikin kula da fadar shugaban ƙasa a shekara mai zuwa

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Abuja - Fadar shugaban ƙasa ta ware Naira biliyan 15.09 domin sayo tayoyin motocin da harsashi bai fasawa, motocin SUV da kananan motoci.

Haka zalika fadar shugaban za kuma ta yi amfani da waɗannan kuɗaden wajen gina ofisoshin mashawarta na musammana da manyan mataimaka na Tinubu.

Tinubu ya warewa fadarsa sama da N15bn

Sannan kuma ta gabatar da jimillar kudi Naira biliyan N5.49 a matsayin tanadin kula da fadar shugaban kasa a shekara mai zuwa, kamar yadda Punch ta kawo.

Kara karanta wannan

ACHR: "Tinubu ya yi wani abin da tsofaffin shugabannin Najeriya suka gagara yi"

Duk wannan yana cikin kudirin kasafin kuɗin 2025 da shugaban ƙasa, Bola Ahmed Tinubu ya gabatar a gaban Majalisar tarayya jiya Laraba.

Ofishin kula da harkokin kasafin kuɗi ne ya fitar da cikakken bayani da alƙaluman kasafin kuɗin 2025 yau Alhamis.

Tinubu ya gabatar da kasafin mai taken, "kasafin gyara ƙasa: samar da tsaro da wadata," a zaman haɗin guiwa na Majalisa ta 10, wamda zai laƙume Naira tiriliyan 47.9.

Yadda fadar shugaban ƙasa za ta kashe kuɗin

A takardar da wakilin jaridar ya ci karo da ita, fadar shugaban ƙasa ta ware N164m domin sayo tayoyin motar sulke da wasu kayayyakin motocin a baɗi.

Haka nan kuma an ware Naira biliyan 1.1 domin canza sababbin motocin SUV da kuma Naira biliyan 3.66 na sayo motocin aiki a fadar shugaban ƙasa.

Tinubu ya sanya farashin Dala a N1,500

A wani rahoton, kun ji cewa shugaban ƙasa, Bola Ahmed Tinubu ya sanya farashin kowace Dala a N1,500 a kasafin kuɗin shekarar 2025.

A jawabin da ya yi a gaban ƴan majalisar tarayya ta 10, Shugaba Tinubu ya ce hakan zai ba gwamnati damar aiwatar da kasafin ba tare da wata tangarɗa ba.

Asali: Legit.ng