Bola Tinubu Ya Yi Amai Ya Lashe kan Naɗin Sabon Shugaban SMDF, Ya Dawo da Mace

• Shugaba Bola Ahmed Tinubu ya sabunta naɗin Fatima Umaru Shinkafi a matsayin shugabar SMDF/PAGMI
• Mai ba shugaban ƙasa shawara kan harkokin yaɗa labarai, Bayo Onanuga ya ce an soke naɗin da aka yi wa Yazid Shehu Ɗanfulani saboda babu gurbi
• Ya ce tsohon shugaban ƙasa, Muhammadu Buhari ne ya fara naɗa Fatima a wannan matsayi kuma ta taka rawar gani

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

State House, Abuja - Shugaban ƙasa, Bola Ahmed Tinubu ya canza shawara game ɗa naɗin shugaban asusun kula da harkokin haƙar ma'adanai watau SMDF/PAGMI.

Mai girma Shugaba Tinubu ya soke naɗin Yazid Shehu Danfulani a matsayin wanda zai shugabanci SMDF/PAGMI, ya ce babu wurin da za a naɗa wani a hukumar.

Hakan na kunshe ne a wata sanarwa da mashawarcin shugaban kasa kan harkokin yaɗa labaru da dabaru, Bayo Onanuga ya wallafa a shafin X ranar Juma'a.

Kara karanta wannan

Tinubu ya yi rabon mukamai, ya ba malamin musulunci matsayi a gwamnatin tarayya

Bola Tinubu ya soke naɗi cikin awanni

An yi wa sanarwar taken, "Shugaba Tinubu ya yi naɗe-naɗen shugabanni a NUC, NERDC, NEPAD, ya sabunta naɗin Fatima Shinkafi a SMDF.”

Sanarwar ta ce Tinubu soke nadin Yazid Danfulani ne saboda "babu wani gurbi a hukumar," inda ta mayar da Fatima Shinkafi a matsayin shugabar hukumar karo na biyu.

A cewar Onanuga, tsohon shugaban kasa Muhammadu Buhari ne ya fara nada Fatima kuma Bola Tinubu ya gamsu da gogewarta, ya kara mata dama a karo na biyu.

Tinubu ya sabun naɗin Fatima Shinkafi

"Shugaban ƙasa ya kuma amince da sabunta nadin Fatima Umaru Shinkafi a matsayin shugabar asusun bunkasa harkokin ma'adanai watau SMDF/PAGMI.

"Tsohon Shugaba Muhammadu Buhari ne ya fara nada ta a wannan aiki kuma an ce tana daya daga cikin masu kawo sauye-sauye a fannin ma’adinai.

"An soke naɗin farko na Yazid Shehu Umar Danfulani a matsayin shugaban SMDF/PAGMI saboda babu wani gurbi a hukumar.”

Kara karanta wannan

Gwamnan Arewa da aka ce ƴan bindiga sun farmaka ya sa DSS sun cafke 'dan jarida

- Bayo Onanuga.

Shugaba Tinubu ya yi rabon muƙamai

A wani rahoton, an ji cewa Shugaba Tinubu ya yi sauye-sauye a hukumar raya Arewa maso Yamma watau NWDC, ya naɗa shugaganni a SEDC.

Shugaban ƙasar ya miƙa sunayen waɗanda yake son su jagoranci hukumomin guda biyu ga majalisar dattawan Najeriya domin tantancewa.

Asali: Legit.ng