Mai Magani Ya Dirkawa Kansa Harsashi a Ciki yayin Gwada Maganin Bindiga a Abuja

• Wani mazaunin birnin Abuja mai suna Usman Isma'il ya jiwa kansa raunuka yayin gwada maganin bindiga da ya haɗa
• Mutumin da ke siyar da maganin gargajiya ya samu munanan raunuka inda ya kwana a asibiti rai a hannun Allah
• Rundunar yan sanda a birnin Abuja ta tabbatar da faruwar lamarin inda ta ce Usman ya harbi cikinsa a kokarin gwada maganin

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

FCT, Abuja - Wani mai maganin gargajiya ya gamu da tsautsayi kan gwada maganin bindiga a Abuja.

Mutumin mai suna Ismail Usman ya kwana a asibiti yayin da ya yi kuskuren harbin kansa a kokarin gwada maganin.

An kai mai maganin bindiga asibiti a Abuja

Tribune ta ruwaito cewa lamarin ya faru ne a kauyen Kuchibuyi da ke birnin Abuja inda mutumin ya samu munanan raunuka.

Kara karanta wannan

'Ya fi bala'in cire tallafi': Sheikh Abubakar Zaria ya yi tofin Allah tsine kan kudurin haraji

Kakakin rundunar yan sanda a birnin Abuja, Josephine Adeh ta tabbatar da haka a cikin wata sanarwa.

Rundunar yan sanda ta ce ta samu kiran gaggawa kan lamarin da ya faru daga mazauna yankin, cewar rahoton Punch.

Yan sanda suka ce ofishin hukumar da ke Byazhin sun dauki Usman zuwa babban asibitin gwamnati da ke Kubwa.

Sanarwar ta ce saboda tsananin raunin da Usman ya samu, an wuce da shi asibitin kwararru na Gwagwalada domin ceto rayuwarsa.

Yadda mai maganin bindiga ya harbi kansa

"Mun samu rahoto daga wani mazaunin yankin, Shandam Michael kan iftila'in da ya faru da Usman Isma'il."

"Usman da aka sani da hade-haden magungunan gargajiya ya harbi kansa a ciki a kokarin gwada maganin bindiga."

"Sai dai an yi rashin nasara maganin bai yi aiki ba inda Usman ya jawowa kansa raunuka wanda aka wuce da shi asibiti domin ceto rayuwarsa."

- Josephine Adeh

Kara karanta wannan

Cire tallafi: Tinubu ya samar da motocin gas domin zirga zirga kyauta a Najeriya

Mai magani ya yi ajalin wani a Bauchi

Kun ji cewa jami’an ‘yan sanda a jihar Bauchi sun cafke wasu mutane biyu kan zargin kisan wani matashi yayin gwada maganin bindiga.

Marigayin Muhammad Ali mai shekaru 43 ya tafi da mai maganin gargajiya da wasu don gwada maganin bindigan a kansa.

Kakakin rundunar a jihar, Ahmed Wakili shi ya tabbatar da haka a ranar Talata 7 ga watan Nuwamba a birnin Bauchi.

Asali: Legit.ng